Sámi musihkkaakademiija doaibma lea hilljožiid nohkan, iige skuvlemiid birra leat šat gullon. Sámi musihkkaakademiijas ordnejedje musihkkaoahpahusa jagi 2020 rádjai. Oahpahus lei prošeavttaid bokte, main ledje máŋggat doaibmit mielde.
Sámi oahpahusguovddáš lei mielde golmma prošeavttas. Dain čielggadedje skuvlenvejolašvuođaid, skuvlema piloterejedje ja oahppoplána ovddidedje. Ulbmilin lei, ahte musihkaoahpahus livččii šaddan bistevažžan.
– Dat lei hui buorre plána iešalddes, lohká Sámi oahpahusguovddáža rektor Eeva-Liisa Rasmus-Moilanen.
Jagiin 2020-2021 Juoiggastit!-prošeavtta oahpahus ordnejuvvui Sámi musihkkaademiija lanjain. Maiddái Ohcejoga gielda leamašan mielde dain prošeavttain. Gielddas oidnet, ahte váttisvuohtan leamašan oažžut skuvlema joatkkašuvvat prošeavttaid maŋŋá.
– Go prošeavttat leat nohkan, de dan maŋŋá eat leat gávdnan doaibmamálle, mainna oažžut skuvlema oassin gieldda dábálaš doaimma, muitala Ohcejoga gieldda buresveadjinhoavda Pirjo Seurujärvi.
Bistevaš musihkkaskuvlejumi ordnemii dárbbašuvvo ruhta
Vai Sámi oahpahusguovddáš basttálii ordnet skuvlema bistevaččat, de lága mielde skuvlenbáikki galggaliit leat Anáris. Rasmus-Moilanen goit oaidná ruhtadeami stuorámus čuolbman.
– Dieđusge mii dárbbašivččiime ruhtadeami dasa, vai sáhtašeimme ollašuhttit dan.
Rasmus-Moilanen muitala, ahte sii leat čielggadan livččiigo skuvlema vejolaš ordnet Ohcejogas ja gávdnogo dasa ruhta.
– Dat ii lean vejolaš. Dat livččii gáibidan hui stuorra ruhtadeami ja mii eat ožžon gostege diekkára, lohká Rasmus-Moilanen.
Sámi musihkkaakademiija viessu lea ain Ohcejogas ja doppe leat musihkkarusttegat. Sámi oahpahusguovddáš lea dolvon sin oastán instrumeanttaid eret. Lanjat goit ain gávdnojit gos oahpahusa sáhtašii addit.
Seurujärvi lohká, ahte musihkkaakademiijas lea fiinna konseapta ja doaibmansajit. Su mielas gánnehivččii vel geahččat, jus basttále ordnet ovttasbargofidnu. Eará plánatnai gielddas gávdnojit.
– Dieđus mis leat jurdagat, ahte rávesolbmoskuvlla sáhtalii ordnet muhtun oanehiskurssaid, sávvá Seurujärvi.
