Anárlaš beanagárdi Ridenorth beatnagiid leat maŋimuš áiggiid sirdán miehtá Lappi, muitala Lapin Kansa -aviisa.
Huskybeanagárddis leat dahkkon valjis elliidsuodjalanalmmuhusat dan maŋŋá, go Lapin Kansa -aviisa almmustahtii suoidnemánus gárddi váttisvuođain artihkkala, mas ovddeš bargit muitaledje, mo singuin ja elliiguin meannudedje funet.
Elliidsuodjalanalmmuhusain čielggai, ahte Ridenorth-fitnodat lei vuođđudan Gáregasnjárgii ođđa beanagárddi. Beanagárddis ii lean dahkkon almmuhus Lappi guovlohálddahusdoaimmahussii, čállá Lapin Kansa.
Satu Natunen Ridenorth oasusfitnodagas muitala Yle Sápmái, ahte Gáregasnjárgii ii leat vuođđuduvvon beanagárdi, baicce beatnagat ledje doppe gaskabottosaččat guokte vahku. Son ii muital, gos beatnagat leat dál, muhto dadjá ahte oassi dain lea goddon eret, go dat ledje nu boarrásat. Son muitala iežas imaštallat, manne ášši lea loktojuvvon ovdan.
Šibitdoaktára mielde gárddi beatnagiin ollu váttut
Sadjásaš šibitdoavttir dagai beanagárdái dárkkistusa ovttas Avvila bolesiin suoidnemánu loahpas. Dárkkistusmátkkis eai almmuhan ovddalgihtii Satu Natunenii.
Šibitdoaktára dieđu mielde beatnagiin ledje ollu váttut ja buozalmasvuođat, nugo ovdamearkka dihtii hávit ja čalbmeváttut. Beatnagat maiddái gillájedje menddo oanehis lahkiiguin ja buot beatnagiin ii lean suoivvabáiki gárddis báhkka gease. Lassin ledje čuolmmat earret eará beatnagiid gáccaid guhkkodas, biepmolihtiid materiálain, beatnagiid lihkadeami mearis ja bargiid máhtus dikšut beatnagiid.
Dárkkistanmátkki maŋŋá beatnagat jávke gárddis, iige leat dieđus gosa.
Dárkkistusa maŋŋá šibitdoavttir gohčui divvut gárddi heajos beliid. Oassi dárkkistusas dihtton áššiin ledje nu hohpolaččat, ahte daiguin ságastalle telefovnnas fitnodateaiggát Natusiin juo dárkkistusa áigge, čállá Lapin Kansa.
Natunen muitalii, ahte lei diđolaš beatnagiid váttuin ja lei geahččalan fáhtet šibitdoaktára. Šibitdoaktára muitalusa vuođul oktage ii lean váldán sutnje oktavuođa Natusa beatnagiin daid njealje jándora áigge go son gozii guovllus.
Bearráigeahčči šibitdoavttir Eva Anunti dagai Gáregasnjárgga beanagárdái ođđa dárkkistusa borgemánus. Báikki alde ledje dušše guoros beatnatvisttit.
Beatnagiid orrunbáiki ii leat dieđus
Dieđus ii leat dat, gosa beatnagat leat sirdojuvvon. Anunti árvalusa mielde Ridenorth beatnagat leat dál 3–4 sierra báikkis miehtá Davvi-Suoma. Árvalus lea dušše vuođđuduvvon šláddariidda. Natunen ii leat muitalan, gos beatnagat leat, ja guovlu lea menddo viiddis ohcat beanagárddiid, čállá Lapin Kansa.
Ridenorth beatnagiid eaiggát ii leat dieđus. Natunen lea muitalan oba áigge, ahte sus dahje Ridenorth fitnodagas ii leat oktage beana, čállá Lapin Kansa. Fitnodagas ledje mannan dálvvi goittotge guokte beanagárddi, main ledje oktiibuot sullii 110 beatnaga.
Beatnagiid eaiggádiid ii sáhte dárkkistit gostige, go dat eai leat almmuhuvvon Biebmobearráigeahču registarii.
Lapin Kansa dieđuid mielde Gáregasnjárgga beanagárddis ledje suoidnemánu dárkkisteami áigge moaddenuppelohkái beatnaga. Beatnagiid lohku ii boađe ovdan bearráigeahččanraporttas, go dat leat čiegus dieđut, čállá Lapin Kansa. Satu Natunen muitala Yle Sápmái, ahte doppe ledje 18 beatnaga, main 11 sirdojuvvojedje eará báikái.
Lappi boleslágádusas leat jođus ovdadutkamat, mat laktásit Ridenorth-fitdodaga doibmii.
Jagi 2015 Satu Natunen dubmejuvvui elliidbiinnideamis norgalaš gearretrievttis. Duomu mielde sus ledje Norggas njeallje heastta, main guokte nelgo jámás ja guokte eará gillájedje sakka váilevaš biebmamis.
