Vorâs čielgiittâs čáittá, et šoŋŋâdâhnubástus hástá sämikulttuur, mii loppâloopâst heevât ärbivuovijd, tááiđuid já tiäđuid. Taat selvân sämmilii tuotâvuođâ -já sovâdâttâmkomission rahtum sierânâs čielgiittâsâst, mii kieđâvuš šoŋŋâdâhnubástus.
Sämmilii päikkikuávlu lieggân kulmâ keerdi jotelub ko eres maailm, mii vaaigut pirrâsân já kulttuurân.
Šoŋŋâduv lieggânem vaaigut eereeb iärrán kyelinaalijd já hárdá puásuituálu. Tondiet poccuuh killájeh ain eenâb puohlágánijn purâdeijein já tavdâtahhein.
Meid šooŋâ robdâalmonij lasanem toovât maaŋgâmuđusijd hemâdâsâid luándust jotteid. Ovdâmerkkân muttoo muotâtile lasseet paartijd.
Iävtuttâs vuáđudiđ sämmilii iäláttâs- já šoŋŋâdâhruttârááju
Totkeeh Klemetti Näkkäläjärvi, Jouni J. K. Jaakkola já Suvi Juntunen láá ráhtám komitean čielgiittâs šoŋŋâdâhnubástus vaiguttâsâin sämikulttuurân. Sij iävtutteh maaŋgâid konkreetlijd tooimâid, et sämikulttuur siäilu šoŋŋâdâhnubástus oovdâst.
Iävtuttum tooimah láá ovdâmerkkân lahâasâttem uđâsmitmeh já sämmilii iäláttâs- já šoŋŋâdâhruttârááju vuáđudem. Eres tooimah lahtoseh luándusuojâlmân, sämiškovliittâsân sehe ärbivuáválii tiäđui já palvâlem siäilutmân sämmilii päikkikuávlust.
Čielgiittâs mield Suomâ staatâ ij lah porgâm tuárvi sämikulttuur siäilutmân šoŋŋâdâhnubástus uhke vyelni.