Kuõrb lie måtmešt peʹccla ääʹšš. Seämmanalla juuʹrdi čeʹvetjäuʹrrneǩ Heini Wesslin, ǥu mõõnni neäʹttlest Aanrest leʹjje koumm jõnn kuõrb, koʹst kueʹhtt leʹjje Čeʹvetjääuʹr vuuʹdest.
Njuäʹmmelvueiʹvv lij pääikla miõlâst tääʹrǩes da mooččâs päiʹǩǩ, da toʹben puõʹli nuʹt 11 hehtaar šoora vuʹvdd. Wesslin lij še jååttam toʹben ääiʹjab taʹnni.
– Tõt leäi nuʹt kuâsttjemnalla da leäi nuʹt dramaattlaž vueiʹnned tõn, ǥu leäi nuʹt seuʹŋŋes jeäʹǩǩääž da inn, mušttli Heini Wesslin.
Vuõššân Wesslin ij ni haaʹlääm mõõnnâd ǩiõččâd kuõrb tõn strääšnaivuõđ diõtt.
Luâđ oođee puälddmõõžživuiʹm
Meäʹcchalltõs tueʹjjad luâđ oođeei puälddmõõžžid. Puälddmõõžži mieʹrren lij oođeed luâđ. Taʹnni Sääʹmjânnmest lij puâllam kuõrbi diõtt juʹn nuʹt 30 hehtaar šoora vuʹvdd, ärvvtââll Meäʹcchalltõõzz luâđsuõjjlemäʹšštobddi Mika Puustinen. Son särnn, što mieʹrr lij nuʹt šurr, što taʹnni ij taarbâž tueʹjjeed luâđ oođeei puälddmõõžžid ni vooʹps.
– Meeʹst leäi jurddjen puäʹldded Sääʹmjânnam vuuʹdest tän ǩieʹzz nuʹt 45 hehtaar, Puustinen maainast.
Meäʹcchalltõõzz tuʹtǩǩummuž mieʹldd kuõrbb lij kuäʹss-ne pueʹrab ǥu luâđ oođeei puälddmõš. Tõõzz vaikkat tõt, muʹvddem päiʹǩǩ puâll.
Puustinen miõlâst kuäʹss-ne leʹčči šiõǥǥ uʹvdded kuõrb pueʹlled. Kuõrb lie takainalla uuʹccab, ǥu tõid čackkeet nuʹt jåʹttlânji.
– Leʹčči aainâs šiõǥǥ nuuʹbbnallšem mäinn, jõs suõjjlemvuuʹdest leʹčče kuõrb, kook jie liâvvân, ouddmiârkkân jeäʹǧǧsuâllõõǥǥâst, što nåkam vuäitčeš uʹvdded pueʹlled. Leâša tõʹst puätt peälštemlääʹǩǩ vuâstta, Puustinen tuâtt.
Peälštemlääʹjjest lååkk, što peälštemtååim õõlǥtemvuõttân lij cõggâd kuõrbid da rääʹjted paaʹrti seuʹrrjõõzzid.
Heini Wessliin miõlâst kuõrbb, kååʹtt leäi nuʹt ââlda da jõnn, leäi vaiggâd da põõlteei.
Son kuuitâǥ vuäinn luâđ peäʹlnn šiõǥǥ ääʹšš še.
– Luâđ feʹrttai oođeed, da jieʹllem lij nåkam, što kuäʹss-ne feʹrttai jääʹmmed, što šâdd mii-ne ođđ.
