Sámedikki ođđa válgabaji doaibmaprográmma hábmejedje ortniiduvvančoahkkimis vuossárgga. Doaibmaprográmma sisttisdoallá sihke viidásut, ollislaš temáid ja oanehis áigge ulbmiliid, mat fas leat eambo konkrehta dásis.
Sámedikkis leat juohke sektorii dahjege fágasuorgái iežaset váldočuoggát, maid guđege sektora lávdegoddi čuovvu barggustis.
Ságadoalli Pirita Näkkäläjärvi muitala, ahte dasa lassin leat oktasaš ulbmilat, mat gusket buot sektoriidda ja olles Sámedikki doaimma. Ovdamearkka dihte nannet sámiid rivttiid eamiálbmogin lea okta dain ollislaš temáin. Dasa laktása maid sámediggelága ođasmahttinproseassa čađaheapmi, dadjá Näkkäläjärvi.
– Mun lean erenomáš duđavaš dan oassái, ahte váldit vuhtii buot golbma Suomas ealli sámegielaid dárbbuid, doarjut sámekultuvrra ja buot árbevirolaš ealáhusaid ja sámeguovllu eallinfámolašvuođa, joatká Näkkäläjärvi.
Näkkäläjärvi illuda maid das, go ođđa oassin das lea maid vásttolašvuođa- ja arvedávgeprográmma huksen.
Ortniiduvvančoahkkimis mearridedje lasihit oktasaš ulbmiliidda maiddái duohtavuođa- ja soabadanproseassa lihkostuvvama doarjuma. Dan lasáhusa evttohii áirras Anni Koivisto.
Áirasiin iešguđet intreassat, maid ovddidit
Sámedikki doaibmaprográmma ulbmiliid lassin várreságadoalliin leat áššit, maid hálidit ođđa válgabajis ovddidit.
Vuosttas várreságadoallin válljejuvvon Leo Aikio hálida joatkit barggus sámi ealáhusaid bealis.
– Dálkkádatrievdan ja dan váikkuhusat min árbevirolaš ealáhusaide lea sihkkarit dat dehálamos ášši, mainna boahtit bargat.
Nubbi várreságadoalli Tuomas Aslak Juuso hálida loktet ovdan maid sápmelaččaid buresveadjima ja vuoigatvuođaid.
– Mun leamaš álot beroštuvvan vuoigatvuođaid ovdáneapmái ja álgoálbmotjulggaštusa duohtandahkamii. Dat leat persovnnalaš beroštumit maid jáhkán, ahte mii stuorra joavkkuin vuolgit ovddidit ovddosguvlui, lohká Juuso.
Sámedikki doaibmaprográmmas gevvon ságastallamis loktanii fuolla maid earret eará Giellagáldu ja sámenuoraid dáiddadáhpáhusa boahttevuođas.
Leena Niittyvuopio-Jämsä loktii ovdan fuola Sámi Giellagáldu beales, go seastindoaimmaid dihte maiddái Ruoŧa Sámediggi lea geahpedeamin Giellagáldu ruhtadeami. Ulla-Maarit Magga fas hálai sámenuoraid dáiddadáhpáhusa ruhtadeami dorvvasteamis ja dáhpáhusa mearkkašumis sámemánáide ja -skuvllaide.
