ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/26
ⵎⵓⵃⵎⵎⴰⴷ ⴰⴽⵓⵏⴰⴹ (ⵙ ⵜⵄⵕⴰⴱⵜ: محمد أكوناض) ⵉⵍⵓⵍ ⴷ ⴳ ⵓⵙⴳⴳⵯⴰⵙ ⵏ 1950 ⴳ ⵓⵙⵓⵏ ⵏ ⵜⵉⵖⵉⵔⵏ ⵜⴰⵎⴰ ⵏ ⵜⵎⴰⵏⴰⵔ ⴳ ⵜⵡⵙⵉⵜ ⵏ ⵉⵃⴰⵃⴰⵏ, ⵢⴰⵜ ⵙⴳ ⵜⵡⵙⵉⵜⵉⵏ ⵜⵉⵎⵇⵔⴰⵏⵉⵏ ⵏ ⵙⵓⵙ, ⵜⵍⵍⴰ ⴳⵔ ⵓⴳⴰⴷⵉⵔ ⴷ ⵎⵓⴳⴰⴷⵓⵔ ⴳ ⵜⵎⵏⴰⴹⵜ ⵏ ⵙⵓⵙ-ⵎⴰⵙⵙⵜ. ⵏⵜⵜⴰ ⴷ ⵢⵉⵊⵊ ⵙⴳ ⵉⵎⵖⵏⴰⵙⵏ ⵉⵎⴰⵣⵉⵖⵏ ⵉⵎⵇⵔⴰⵏⵏ, ⵢⵓⵙⵉ ⴰⵏⵣⴳⵓⵎ ⵏ ⵜⵎⴰⵣⵉⵖⵜ ⴳ ⵎⵏⵏⴰⵡ ⵏ ⵉⴳⵔⴰⵏ ⵙⴳ ⵣⵉⴽⴽ, ⵢⵓⵔⴰ ⵎⵏⵏⴰⵡ ⵏ ⵉⴷⵍⵉⵙⵏ ⵙ ⵜⵎⴰⵣⵉⵖⵜ, ⵉⵙⵡⵡⵓⵔⵉ ⴰⵡⴷ ⴳ ⵉⴳⵔ ⵏ ⵓⵏⵙⵙⵖⵎⵙ ⵙⴳ ⵓⵙⴳⴳⵯⴰⵙ ⵏ 1993. ⵉⵙⵙⵖⵔⴰ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴳ ⵢⴰⵏ ⵓⵙⵉⵏⴰⵏ ⴳ ⵓⴳⴰⴷⵉⵔ, ⵉⴳ ⵢⴰⵏ ⴳ ⵉⴳⵎⴰⵎⵏ ⵓⵔⵎⵉⴷⵏ ⴳ ⵎⵏⵏⴰⵡⵜ ⵏ ⵜⵎⵙⵎⵓⵏⵉⵏ ⴰⵎ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ, ⴰⵢⵢⴰⵡ ⵏ ⵓⴳⴰⴷⵉⵔ, ⵜⴰⵙⴷⴰⵡⵉⵜ ⵏ ⵓⵏⴱⴷⵓ (ⴰⴳⴰⴷⵉⵔ), ⵜⵉⵔⵔⴰ, ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⴷ ⵜⵉⵢⵢⴰⴹ. ⵢⵓⵎⵥ ⵜⴰⵙⵎⵖⵓⵔⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⵓⵖⵍ ⴰⵙⴳⴳⵯⴰⵙ ⵏ 2006.
ⵣⵓⵏ ⴷ ⴰⴽⴽⵯ ⵜⴰⵣⵣⴰⵏⵉⵏ ⴳ ⵡⴰⵡⵜⴰⵢ ⵏⵏⵙ, ⵉⴽⵛⵉⵎ ⵎⵓⵃⵎⵎⴰⴷ ⴰⴽⵓⵏⴰⴹ ⵙ ⵜⵎⵣⴳⵉⴷ ⵏ ⵓⵙⵓⵏ ⵣⵉⴽⴽ, ⴰⵔ ⴷⴳⵙ ⵉⵇⵇⴰⵔ ⵍⵇⵕⴰⵏ ⴰⵔ ⵍⵍⵉⴳ ⵜ ⵉⵃⵙⴰ ⵚⴹⵉⵚⵜ ⵜⵡⴰⵍ ⵎⵎⴹⴼⴰⵕⵏⵉⵏ. ⵉⴷⴷⵓ ⵉⵍⵎⵎⴰ ⵖⵔ ⵜⵎⴰⵏⴰⵔ ⵉⵙⵎⴷ ⴷⴳⵙ ⵜⵉⵖⵔⵉ ⵏⵏⵙ ⵜⴰⵎⵏⵣⵓⵜ ⴷ ⵉⵎⵉⴽⴽ ⵙⴳ ⵜⵖⵔⵉ ⵜⴰⵙⵉⵏⴰⵏⵜ.
ⴷⴳ ⵓⵙⴳⴳⵯⴰⵙ ⵏ 1965, ⵉⵎⵎⵓⴷⴷⴰ ⵎⵓⵃⵎⵎⴰⴷ ⴰⴽⵓⵏⴰⴹ ⵙⴳ ⵜⵎⵣⵉⵔⵜ ⵏⵏⵙ ⴰⴼⴰⴷ ⴰⴷ ⵉⴹⴼⵕ ⵜⵉⵖⵔⵉ ⵏⵏⵙ ⴳ ⵓⵙⵉⵏⴰⴳ ⴰⵏⵙⵍⵎ ⵏ ⵜⵔⵓⴷⴰⵏⵜ ⵏⵏⴰ ⵉⵜⵜⵓⵙⵙⴰⵏⵏ ⴳ ⵜⵎⴷⵉⵏⵜ ⵏ ⵜⵔⵓⴷⴰⵏⵜ ⴰⴽⵓⴷ ⴰⵏⵏ, ⴰⵙⵉⵏⴰⴳ ⵏⵏⴰ ⴳ ⵙⵙⵓⴼⵖⵏ ⵎⵏⵏⴰⵡ ⵉⵎⵖⵏⴰⵙⵏ ⵉⵎⴰⵣⵉⵖⵏ, ⵣⵓⵏ ⴷ ⵃⵎⴰⴷ ⴰⴷⵖⵔⵏⵉ, ⵃⴰⵙⴰⵏ ⵉⴷ ⴱⵍⵇⴰⵙⵎ ⴷ ⵡⵉⵢⵢⴰⴹ.