第57屆英國下議院選舉
第57屆英國下議院選舉
| |||||||||||
---|---|---|---|---|---|---|---|---|---|---|---|
‹ 2015 • ![]() | |||||||||||
2017年6月8號 | |||||||||||
選舉類型 | 下議院 | ||||||||||
議席數目 | 650 | ||||||||||
選舉席次 | 650(過半數要326席) | ||||||||||
選舉統計 | |||||||||||
總投票百分比
| |||||||||||
68.7% ▲ 2.6% | |||||||||||
文翠珊-保守黨 | |||||||||||
投票數 | 13,650,900 | ||||||||||
獲得議席 | 317 ▼ 14 | ||||||||||
42.4% | |||||||||||
郝爾彬-工黨 | |||||||||||
投票數 | 12,858,652 | ||||||||||
獲得議席 | 261 ▲ 29 | ||||||||||
40.0% | |||||||||||
施雅晴-![]() | |||||||||||
投票數 | 977,569 | ||||||||||
獲得議席 | 35 ▼ 21 | ||||||||||
3.0% | |||||||||||
自由民主黨 | |||||||||||
投票數 | 2,368,048 | ||||||||||
獲得議席 | 12 ▲ 3 | ||||||||||
7.4% | |||||||||||
范愛玲-民主統一黨 | |||||||||||
投票數 | 292,316 | ||||||||||
獲得議席 | 10 ▲ 2 | ||||||||||
0.9% | |||||||||||
新芬黨 | |||||||||||
投票數 | 238,915 | ||||||||||
獲得議席 | 7 ▲ 3 | ||||||||||
0.8% | |||||||||||
政黨議席分佈圖 | |||||||||||
![]() | |||||||||||
317 保守黨
35 蘇格蘭民族黨
10 民主統一黨
|
261 工黨
12 自由民主黨
7 新芬黨
| ||||||||||
![]() 英國首相 | |||||||||||
第57屆英國下議院選舉響2017年6月8號舉行[1]。
今屆選舉首相文翠珊領導嘅執政保守黨雖然保住國會下議院最大黨嘅地位,但係就攞唔到過半數嘅議席維持單獨執政,出現咗懸峙國會嘅局面,意味著文翠珊提前大選嘅政治豪賭失敗收場,面臨落台壓力[2]。
背景
[編輯]2017年4月18號,文翠珊主持完內閣會議,突然響唐寧街十號首相府出面宣布,將原定2020年5月舉行嘅選舉提前到6月8號。文翠珊話政府已經就脫歐談判制定好計劃,但係國會入面對計劃出現分歧在野黨阻撓脫歐計劃,認為咁會削弱英國同歐盟談判嘅立場,話為咗保持政局穩定,迫於無奈之下決定提前選舉[1],但係提前選舉要國會三分之二支持,即係四百三十四個議員支持先可以解散,執政保守黨而家響國會只係佔三百三十席,意味著動議要在野工黨議員支持先過到,下議院會響4月19號表決。[3]。
但係文翠珊之前多次強調唔會提前舉行選舉,包括從上年宣布角逐保守黨黨魁,到入主首相府以來,都多次表明唔會提前選舉,而家就突然改口「轉軚」,相信係要響保守黨支持率大幅領先下,鞏固執政優勢,唔想重蹈前首相白高敦覆轍,當時白高敦響2007年接替貝理雅做首相之後,就對提前選舉諗咗好耐,結果之後民望下跌,錯過鞏固執政機會,最尾三年之後黯然落台。而另一方面,文翠珊響施政、以至脫歐事務上成日受到黨內強硬派制肘,所以佢希望藉住提前選舉,擺平黨內唔同勢力[4]。
英國響3月底啟動《里斯本條約》第50條,展開脫離歐盟程序。而文翠珊嘅脫歐談判立場,包括貿易、人口流動之類都比之前有所軟化,選民會唔會藉住選舉同佢講唔好,成為保守黨最大嘅隱憂。但係可以肯定唔變嘅係英國會如期響2019年脫離歐盟,首相府發言人喺4月18號強調,脫歐時間表唔受影響。歐盟亦話,會根據早前訂立嘅時間表同英國談判[4]。
5月3號,文翠珊去白金漢宮,覲見英女王伊利沙伯二世。由於根據法例,下議院已經響3號午夜解散,因此文翠珊今次覲見,只係通報英女王將會舉行選舉嘅決定。之後文翠珊發表講話,佢話無論邊一個黨贏到選舉,首要工作都係幫英國搵最好嘅脫歐協議。如果出現懸峙國會,將會對脫歐談判不利,因此英國需要穩定而且有力嘅領導,講明會響脫歐談判到做「難纏嘅女人」。佢又重申,情願響冇協議情況下硬脫歐,都唔會接受壞協議。同埋佢又話,最近發生嘅事件顯示,歐盟有人唔希望英國脫歐談判成功。歐洲大陸傳媒,亦曲解英國談判立場,指呢啲係旨在影響選舉結果[5]。而歐洲理事會主席圖斯克反駁,口舌之爭只會對談判造成障礙[6]。
同日,歐盟首席談判代表巴尼耶公布談判任務草案,佢話如果雙方唔可以響2019年3月正式脫歐限期前達成協議,歐盟已經準備好應急方案,佢話必須先解決英國債務計算問題,才會展開貿易方面嘅談判,強調脫歐談判時間無多,應盡快展開,但唔會輕易達成協議。同時亦強調,費用係用響英國同歐盟雙方同意資助計劃同項目財務結算並唔係懲罰,但就冇講明英國要畀幾多費用。而英國《金融時報》報道就話,歐盟將英國脫歐嘅前期費用由之前估計嘅六百億歐元,提高到最多一千億歐元。英國脫歐事務大臣戴德偉接受電視台訪問時話,英國會認真睇自己嘅責任,但唔會支付一千億歐元嘅脫歐費用,只會支付法律上應付嘅費用,唔係歐盟要話畀幾多英國就要畀咁多[7]。
意見
[編輯]保守黨
[編輯]保守黨黨魁文翠珊話,上年公投決定脫離歐盟之後,國家已團結起來,但係國會就出現分歧。佢批評,反對派嘅行為削弱英國同歐盟談判立場,所以響迫於無奈之下,決定提前大選,又話政府已經就脫歐談判制定好計劃,強調唔會因為在野黨反對而改變立場。佢嘅發言人話,提前選舉嘅決定得到閣員支持,同埋已經知會英女王有關計劃[3]。
工黨
[編輯]工黨黨魁郝爾彬對文翠珊嘅決定表示歡迎,但強調會尊重國民脫歐嘅決定[3]。
前首相貝理雅響接受天空電視台訪問時話,保守黨成功以一個關乎國家前景利益嘅議題為大選定調。又表示明白文翠珊點解提早選舉,因為佢唔想響脫歐談判踏入艱巨時期先舉行選舉,但佢唔肯正面回應現任工黨黨魁郝爾彬係唔係擔任首相嘅最佳人選[8]。
自由民主黨
[編輯]自由民主黨亦表示支持提前選舉[3]。
蘇格蘭民族黨
[編輯]蘇格蘭首席部長施雅晴就形容,文翠珊誤判政治形勢,認為提前大選會幫到佢推動蘇格蘭再次舉行獨立公投[3]。
候選人
[編輯]保守黨
[編輯]文翠珊到牛津郡拉票期間,同一個有學習障礙嘅選民對話。呢位選民批評政府緊縮開支政策,大幅削減福利援助。而英國醫療服務12號因為電腦系統太舊而頂唔住勒索軟件攻擊,事件令保守黨政府嘅緊縮政策惹來更多批評,不過民意調查話,保守黨重領先工黨約十個百分點。另外文翠珊接受電視台響社交網站嘅直播訪問,工黨黨魁郝爾彬亦透過網絡平台,要求同文翠珊公開辯論。一直拒絕出席辯論嘅文翠珊強調,直接聽取選民意見比接受政敵提問重有意義[9]。
倫敦恐襲之後一度暫停競選活動。領導保守黨嘅首相文翠珊四出拉票,禮拜一先後到蘇格蘭愛丁堡同西約克郡拉票。佢響倫敦恐襲發生之後被人翻舊帳,批評佢做內政大臣嗰時大幅裁減兩萬個警員。文翠珊回應話當年有保住反恐預算冇被削減,宜家亦有撥款增加武裝警員數目。她又提到倫敦恐襲,表示支持警方響對付恐怖分子時格殺勿論[10]。
工黨
[編輯]而在野工黨魁郝爾彬響倫敦恐襲之後都一度暫停競選活動。第日就到英格蘭東北部造勢,佢要求文翠珊為當年削減警力辭職落台,不過佢自己亦被傳媒攻擊,話佢前年曾經響訪問到講唔應該阻止懷疑極端分子出國參與聖戰,又批評政府沒收佢哋嘅護照,反恐立場受到質疑。同郝爾彬同屬工黨嘅倫敦市長簡世德到恐襲現場睇過之後,亦批評政府削減倫敦警隊預算[10]。
民意調查
[編輯]2017年4月18號,最新民意調查話保守黨嘅支持度拋離工黨十一到廿一個百分點[4]。
2017年5月4號,最新民意調查話保守黨嘅支持度拋離工黨十七到廿四個百分點[5]。
2017年6月6號,最近多個民意調查都話保守黨支持度只有大約四成,領先工黨嘅百分點只有個位數,亦有民意調查都話,兩個相差唔夠一個百分點[10]。
後續
[編輯]保守黨
[編輯]首相文翠珊成為眾矢之的,黨內外都有要求佢落台嘅聲音[2]。
前財相歐思邦話,今次大選結果無論係點都對文翠珊抑或保守黨來講都係災難性,重有保守黨議員認為佢應該考慮去留問題[2]。
脫歐事務大臣戴德偉就話,選舉結果反映英國民心思變,尤其係蘇格蘭同英格蘭北部[2]。
工黨
[編輯]而選前只有二百二十九席嘅工黨就有超過三十席進帳,成績遠超預期。就連從1918年開始,已經係保守黨根據地嘅坎特伯雷區同自由民主黨前黨魁、做過副首相嘅克萊格響約克郡設菲爾德嘅議席都成為工黨嘅囊中物。工黨黨魁郝爾彬話,文翠珊已經喪失民意授權,應該要為敗選負責[2]。
蘇格蘭民族黨
[編輯]至於響上次大選冒起嘅蘇格蘭民族黨議席大幅減少,對將來推動蘇格蘭獨立公投有一定影響,領袖施雅晴承認結果令人失望[2]。
分析
[編輯]選前
[編輯]分析話,今次選舉將會對文翠珊脫歐版本嘅一次信任表決,但有政治學者指出,文翠珊嘅脫歐立場或者會引來部分保守黨支持者不滿,成為選舉變數。而亦有分析話提前選舉將會幫助增加保守黨響國會下議院議席嘅優勢[4]。
選後
[編輯]文翠珊四月宣布提前大選,原來諗住係要擴大保守黨響國會擁有嘅三百三十一席嘅優勢,可以增加響脫歐談判入面嘅籌碼,當時保守黨響支持度領先工黨超過廿點,原本係要攞到壓倒性贏出係絕對冇問題。但係之後形勢逆轉,保守黨提倡嘅緊縮政策唔得民心,相反工黨雖然選前民意調查一直處於下風,但係無包袱嘅黨魁郝爾彬用一份被形容係八十三年來最左最民粹嘅政綱,對抗保守黨,建議大幅增加公營房屋、醫療開支、向有錢人加稅、大學學費全免之類,雖然傳媒劣評如潮,但係提出嘅福利政策就攞隨後生選民支持,兩黨嘅支持度不斷收窄。加上文翠珊畀人話佢做內政大臣期間為咗慳錢削減警力,為臨近選舉嘅多宗恐襲埋下種子,令佢民望急劇下滑。又加埋文翠珊向保守黨票源長者福利開刀,提出資產響十萬英鎊以上嘅長者自己畀護理錢,來填補全民醫療虧損,呢班受影響嘅老人正正係保守黨嘅堅定支持者,此消彼長之下,再加埋年輕人不滿現狀,自文翠珊宣布提前大選之後,多咗成百萬年齡介乎響十八到三十四歲嘅人登記做選民,成為反保守黨嘅重要力量[2]。
而今次大選入面多個細黨都出盡影響力,綠黨講到明要阻止保守黨攞到壓倒性優勢,減少出選人數,讓路畀工黨,其他嘅例如婦女平等黨、全國醫療行動黨,甚至係自由民主黨都一樣攜手向呢個目標進發,佢哋透過互聯網公布配票策略,勢要阻止文翠珊成王。
英國懸峙國會已經定局,成為脫歐之後英國政壇繼續被唔確定因素困擾,究竟文翠珊能唔能夠繼續做首相,保守黨會同邊嗰政黨籌組聯合政府,全部都冇答案[11]。
攷
[編輯]- ↑ 1.0 1.1 (繁體中文)英國提前六月舉行大選,now新聞,2017年4月18號。
- ↑ 2.0 2.1 2.2 2.3 2.4 2.5 2.6 (繁體中文)英國大選 保守黨議席未過半出現懸峙國會,now新聞,2017年6月9號搵到。
- ↑ 3.0 3.1 3.2 3.3 3.4 (繁體中文)英國提前在六月舉行大選 冀平息脫歐爭議,now新聞,2017年4月18號。
- ↑ 4.0 4.1 4.2 4.3 (繁體中文)六月大選反映對政府脫歐立場的信任,now新聞,2017年4月18號。
- ↑ 5.0 5.1 (繁體中文)文翠珊見英女王 通知解散下議院,now新聞,2017年5月4號搵到。
- ↑ (繁體中文)圖斯克指口舌之爭無助英國脫歐談判,now新聞,2017年5月5號搵到。
- ↑ (繁體中文)文翠珊斥歐盟官員圖影響大選,now新聞,2017年5月4號搵到。
- ↑ (繁體中文)貝理雅指保守黨以國家利益吸引選民支持,now新聞,2017年5月2號搵到。
- ↑ (繁體中文)文翠珊拉票遭選民當面批評福利政策,now新聞,2017年5月16號搵到。
- ↑ 10.0 10.1 10.2 (繁體中文)英國大選前兩大黨恢復競選活動,now新聞,2017年6月6號搵到。
- ↑ (繁體中文)郝爾彬推民粹政綱吸引選民,now新聞,2017年6月9號搵到。