2024年夏季奧林匹克運動會

2024年夏季奧林匹克運動會
原文名	Jeux de la XXXIIIᵉ olympiade
官方嗌法	Jeux de la XXXIIIᵉ olympiade
係一個	運動會
發生喺	法國
位置	2028年夏季奧林匹克運動會
日期	2024年
之前係	2020年夏季奧林匹克運動會
共享類	維基同享中有關2024 Summer Olympics嘅同享資源
座標	48°51′N 2°21′E
官網	olympics.com/fr/paris-2024
2024年夏季奧林匹克運動會嘅位置
[改維基數據]

2024年夏季奧林匹克運動會係第33屆現代夏季奧林匹克運動會，舉行日期係2024年7月26號到8月11號。

呢屆奧運會有206個代表團（包括204個國家同埋地區代表團、難民代表團），共10,714人參加，不過俄羅斯、白俄羅斯因為支持俄羅斯入侵烏克蘭，違反奧林匹克休戰協議，唔可以用國家隊名義參加，但國際奧委會為咗畀符合資格嘅俄羅斯籍運動員同埋白俄羅斯籍運動員能夠以個人身份參加比賽，特別設立咗個人中立運動員代表團。另一方面，對於畀被國際社會指控喺加沙地帶實行種族滅絕行動嘅以色列，巴黎市長Anne Hidalgo話：「同奧運會同殘奧會有關嘅以色列制裁係唔可能嘅。」；而國際奧林匹克委員會就警告阿拉伯同支持巴勒斯坦國嘅選手如果拒絕同以色列運動員競爭，佢哋將會被禁止參賽，結果阿拉伯世界列強亦只能乖乖就範。

申辦過程

喺2017年9月13號，國際奧林匹克委員會响秘魯利馬舉行嘅第131次國際奧委會全體代表大會入便，確認由法國巴黎主辦呢屆夏季奧運會，另外帆船運動就响馬賽舉辦，而滑浪比賽就喺大溪地搞。

賽事焦點

• 霹靂舞係呢屆夏季奧運會期間限定項目，結果由加拿大選手金菲力、日本選手湯淺亞實順利奪冠。
• 2024年7月27號，香港女子西洋劍手江旻憓响女子重劍個人賽响決賽以13：12打贏法國選手奧莉蓮‧馬路比頓，成為九七回歸後嘅第二位奧運冠軍。
• 2024年7月29號，香港男子西洋劍手張家朗响男子花劍個人賽响決賽以15：14打贏意大利選手菲利普‧馬池，成為香港史上第一位連續兩屆奧運冠軍。
• 2024年8月9號，西班牙足球代表隊响男子足球決賽踢足120分鐘，以5：3打贏有主場之利嘅法國足球代表隊，繼1992年巴塞羅拿奧運會之後，相隔32年後再次贏得奧運足球金牌。
• 中國國家隊包攬跳水項目全部八面金牌，係史上首次，一共攞到八金兩銀一銅。
• 中國國家隊包攬乒乓波項目全部五面金牌，一共攞到五金一銀。
• 本屆奧運會嘅馬拉松項目開放畀公眾參與，係成個現代奧運會史上，首次有比賽項目開放畀公眾參與，體現咗呢屆奧運會嘅口號：「奧運更開放」。

比賽結果

响206個參賽國同埋地區入便，一共有91個國家同地區登上獎牌榜（唔計由俄羅斯、白俄羅斯選手組成嘅個人中立運動員代表團），係歷嚟第二多；另外，美國同中國代表團同樣攞到40面奧運金牌，亦係成個現代奧運會史上，第三次有多過一個代表團贏得同樣最多數目嘅金牌（對上兩次係1948年聖莫里茨冬季奧運會嘅挪威、瑞典，同埋2018年平昌冬季奧運會嘅挪威、德國）。

美國隊以40金44銀42銅，總共126面獎牌，坐擁獎牌榜首位；中國隊以40金27銀24銅，總共91面獎牌排第二；日本隊以20金12銀13銅、總共45面獎牌排第三；澳洲隊以18金19銀16銅、總共53面獎牌排第四；東道主法國隊攞到16金26銀22銅、總共64面獎牌排第五。以總獎牌計，美國以126面獎牌排第一，中國以91面獎牌排第二，英國以65面獎牌排第三，法國以64面獎牌排第四，澳洲以53面獎牌排第五。中華台北隊以2金5銅，總共7面獎牌排第35；香港隊以2金2銅、總共4面獎牌，同菲律賓隊並列37位。