Wikipedia:是日正文

是日正文

呢粒星代表咗響維基百科度嘅正嘢。

響頭版度顯示咗其中一篇正文嘅頭節。至於今年嘅隊可以響呢度搵到。

你可以響Wikipedia:是日正文/請求度整新嘅請求或者響現有嘅請求度加入註解。

要將一篇文顯示響頭版度，首先篇文一定要係正嘅（去提議一篇文做好正嘅，請睇Wikipedia:正文候選），同埋嗰一篇文一定要有頭節同埋合適嘅圖片，以便響頭版度用。

如果你發現到將會響頭版顥示嘅正文係有問題，而又有時間改期嘅話，請向其中一位管理員聯絡。

捷徑

正嘢：

正嘢工具：

同儕互評

正文工具：

是日正文歸檔

清除呢一版嘅快取 • 清除頭版嘅快取。

是日正文

蝴蝶，學名叫真蝶總科，廣東話舊時嗌𧌇䖢，係一個亞目嘅昆蟲。同其他昆蟲一樣，蝴蝶屬於節肢動物－佢哋身體嘅表面有一節節嘅外骨骼，而成蟲嘅身體分做頭、胸同埋腹三橛；蝴蝶興响日頭行動，全部物種都識飛，兩對翼就生咗喺個胸部嘅背脊嗰度，而蝴蝶嘅翼係佢哋同其他昆蟲比起上嚟最樣眼嘅特徵之一－蝴蝶嘅翼上面有鱗片，鱗片組成好多樣又鮮艷奪目嘅色水同斑紋。蝴蝶呢種樣眼特徵令到好多人都覺得佢哋好靚，佢哋亦都因為噉而好受藝術家歡迎。

蝴蝶係一種完全變態嘅昆蟲，即係話一隻蝴蝶一世蟲會經過膥、幼蟲、蛹同埋成蟲四個階段：一隻大咗肚嘅蝴蝶乸會喺啲植物嘅葉上面產卵；跟手啲幼蟲（毛蟲）孵咗出嚟之後就會靠食嗰啲葉嚟維生，啲幼蟲生到咁上下就會結蛹；當變態嘅過程完成咗之後，個蛹會爆開，隻成蟲（蝴蝶）就會由個蛹嗰度捐出嚟；等兩對翼乾咗之後，佢就會飛去搵嘢食同伴侶；交配完咗之後，啲蝴蝶乸就會產卵；而無論公定乸，蝴蝶通常喺交配嘅過程完咗之後冇幾耐就會死。佢哋嘅下一代跟住就會由頭噉經歷過呢個由生到死嘅過程。呢個過程做一次要幾耐係睇物種嘅：熱帶嗰頭啲蝴蝶物種好多時一年閒閒地生成兩三代咁多，而响凍啲地區嘅蝴蝶物種就好多時就要成幾年先至生到一代。

喺生物分類法當中，蝴蝶係鱗翅目入面鳳蝶總科嘅一個總科單一進化支（即係話冚唪唥都由同一個物種進化出嚟），係飛蛾嘅近親。蝴蝶嘅下級分類一共有 7 個科，包含咗大約 18,500 個物種。呢啲多樣嘅物種係由遠古（5,600 萬年嘅古新世）嘅一種飛蛾嗰度進化出嚟嘅。 (成篇文章……)

以前嘅正文：故仔 – 嶺南大學 (廣州) – 灰狼

歸檔 – 提名 – 全部94篇正文...

下個月嘅正文

注意力係一系列嘅行為同認知過程，涉及一個認知系統由接收到嘅資訊當中揀一部份出嚟集中處理，並且忽略嗰啲唔係集中處理緊嘅資訊：一個認知系統無時無刻都喺度接收大量嘅資訊，包括由外界嚟嘅感官資訊同有關自身內部狀態嘅資訊；好多時，為咗要有效解決佢生存所需要解決嘅問題，個認知系統要集中處理同佢生存最有啦掕嗰啲資訊，同時要忽略嗰啲同佢生存冇乜啦掕嘅資訊。喺對注意力嘅科學研究上，科學家一般都會將注意力想像成一種有限嘅資源，由個認知系統嘅決策系統決定要點分配落去唔同嘅資訊源嗰度。喺包括人在內嘅脊椎動物當中，腦係認知嘅中心，而大腦皮層當中嘅額葉同頂葉之間嘅網絡同注意力控制零舍有關。

有關注意力嘅研究喺認知心理學、認知科學、神經科學、市場學以及教育學等嘅多個領域上都係受關注嘅課題。注意力研究會剖析邊啲感官資訊或者訊號傾向吸引得到人同動物嘅注意力、呢啲資訊同訊號會點樣影響神經細胞嘅狀態、以及注意力同第啲行為認知過程（好似係記憶）之間嘅關係。除此之外，精神病理學亦都有研究創傷性腦損害等嘅病變會點影響病人喺注意力方面嘅表現。

注意力同心流體驗好有關係。心流係一種特殊嘅心理狀態，涉及個人極度專心做一樣有挑戰性嘅作業－「有挑戰性嘅作業」可以係打波、捉棋、畫畫以至打機呀噉。經歷過心流嘅人後尾講返出嚟話，心流唔單只令到佢哋好專心，仲令到佢哋覺得時間好似過得好快、喪失自我意識同埋好想再做多次嗰樣作業，而且心流仲好幫到個人提升佢喺嗰樣作業上嘅技術。因為噉，心流同注意力研究對於教育學、管理學以及遊戲設計等方面都相當有應用價值－例如一個遊戲設計師，佢通常都會想啲玩家喺玩佢整嘅遊戲嗰陣經歷心流，所以會有興趣了解呢方面嘅研究。 (成篇文章……)

以前嘅正文：蝴蝶 – 故仔 – 嶺南大學 (廣州)

歸檔 – 提名 – 全部94篇正文...