ក្រុមរបាំអង្គរដែលត្រូវបានបង្កើតឡើងក្នុងខែវិច្ឆិកាឆ្នាំ១៩៨៦ដោយជនភៀសខ្លួនខ្មែរនៅទីក្រុង Lowell រដ្ឋ Massachusetts នឹងសម្តែងសិល្បៈជូនទស្សនិកជនទស្សនាកម្សាន្តដោយឥតគិតថ្លៃនៅទីក្រុង Williamtownsនៅថ្ងៃសៅរ៍ និងនៅទីក្រុង Lowell ថ្ងៃអាទិត្យសប្តាហ៍នេះដើម្បីអបអរខួប៣៥ឆ្នាំរបស់ខ្លួន។
ក្រុមសិល្បៈនេះត្រូវបានបង្កើតឡើងដើម្បីរក្សាសិល្បៈប្រពៃណីវប្បធម៌ខ្មែរដែលស្ទើរតែបាត់បង់ទាំងស្រុងក្នុងរបបខ្មែរក្រហមដែលបង្កើតសិល្បៈបដិវត្តន៍ជំនួសសិល្បៈប្រពៃណីវប្បធម៌ខ្មែរដែលជាកេរតំណែងខ្មែរដ៏រុងរឿងច្រើនសតវត្សរ៍មកហើយនោះ។
លោកទឹម ថូ សហស្ថានិកក្រុមរបាំអង្គរបានប្រាប់វីអូអេថា៖
«អ៊ីចឹងបំណងមុនដំបូងគឺបង្កើតដើម្បីរក្សាវប្បធម៌ខ្មែរគោលបំណងគឺចង់រំលែក ចង់ចែកដល់កូនខ្មែរដែលកើតនៅជំរំក្តី កើតនៅសហរដ្ឋអាមេរិកក្តីហ្នឹងគឺថា ចង់ឱ្យចេះឱ្យយល់ពីតម្លៃវប្បធម៌របស់យើង។អាហ្នឹងគឺបំណងធំដែលផ្តើមមុនដំបូង»។
លោកបន្តថា គោលបំណងបន្ទាប់គឺផ្សព្វផ្សាយអំពីសិល្បៈប្រពៃណីវប្បធម៌ខ្មែរដ៏រុងរឿងដល់ជាតិសាសន៍ដទៃ។សិល្បៈរលត់ជាតិរលាយ សិល្បៈពណ្ណរាយជាតិថ្កើងថ្កាន។
ថ្លែងអំពីការសម្តែងជូនទស្សនាដោយឥតលក់សំបុត្រនេះលោកនិយាយថា៖
«អ៊ីចឹង ត្រឡប់មកវិញក្នុងការធ្វើសិល្បៈនេះមិនមែនដើម្បីលុយទេគឺថា ស្រឡាញ់ ស្ម័គ្រចិត្ត ប្តូរផ្តាច់ធ្វើម្ត៉េចដើម្បីឱ្យជាតិយើងរស់»។
លោកឱ្យដឹងថា លោកបានរៀនសិល្បៈពីគ្រូរបស់លោកនៅជំរំជនភៀសខ្លួនទាំងនៅតាមព្រំដែនកម្ពុជាថៃ និងនៅជំរំជនភៀសខ្លួននៅប្រទេសហ្វីលីពីន។
លោកឱ្យដឹងទៀតថា លោកនឹងមិត្តភក្តិដែលបានរៀនសិល្បៈនៅជំរំជាមួយគ្នា ការបង្កើតក្រុមសិល្បៈនេះឡើង ដែលនៅគ្រាដំបូងមានការលំបាករកសម្ភារៈសិល្បៈ អ្នកមានចំណេះដឹងខាងសិល្បៈរហូតដល់រកថវិកាជំនួយ។
ក្រុមសិល្បៈរបាំអង្គរធ្លាប់បានសម្តែងក្នុងកម្មវិធីល្បីៗមួយចំនួនដូចជាការសម្តែងនៅសេតវិមាន ការសម្តែងក្នុងកម្មវិធីBoston's First Nightនៅរដ្ឋ Massachusetts កម្មវិធីAll-America City នៅទីក្រុង Philadelphiaរដ្ឋ Pennsylvania ជាដើម។
លោកទឹម ថូមានមោទនភាពចំពោះការរីកចម្រើនរបស់ក្រុមរបាំអង្គរកន្លងមក ហើយលោករីករាយដែលលោកមានអ្នកបន្តវេនដែលមានសមត្ថភាពខ្ពស់ធ្វើជានាយកប្រតិបត្តិរបស់ក្រុមរបាំអង្គរ៕
