Imibono Kahulumende weMelika
U-Secretary of State Mike Pompeo Ubumba Iqula leCommission on Unalienable Rights,
Unobhala obona ngobudlelwano beMelika lamanye amazwe womhlaba, U- U.S. Secretary of State Mike Pompeo unxuse iqula lengcwethi ezibona ngezamalungelo oluntu ezibumbe ikomishini eyeCommission on Unalienable Rights, ngenjongo yokuphuma lamacebo okuqondisa ukuhlonitshwa kwamalungelo oluntu kweleMelika.
Ekwethulweni kombiko wale ikomishini u- Pompeo, uthe ngempela eleMelika lasungulwa ngokuqhakathekisa amalungelo oluntu njalo uhulumende waleli lizwe usebenza gadalala ukulondoloza iziqondiso ezivikela ukwephulwa kwelungelo leli.
“Lapho eleMelika lithola uzibuse, abalwela ilizwe leli babhala kusisekelo sombuso ukuthi kuqhakathekile ukuhlonipha abantu bonke ngendlela efanayo, ngoba uNkulunkulu wadala umuntu wonke ngendlela efanayo kungakhathalekile ukuba umgumbala bani. Wonke umuntu ulelungelo elifanayo lokuphila ekhululekile.”
U-Pompeo uqhubeke ethi i-Commission on Unalienable Rights, ikuvheza sobala ukuthi wonke umuntu ulelungelo lokukhonza ekhululekile njalo ilungelo lokuthenga impahla etshiyeneyo esebenzisa imali yakhe.
“Akula umuntu olakho ukukholisa impilo yakhe, nxa angayenelisi ukuthenga akufunayo ngemali yakhe, njalo akula lizwe lapha emhlabeni wonke jikelele, elilakho ukutshela uzulu ukuthi bakhululekile, nxa izizalwane zalelozwe zingelathuba lokukhonza bekhululekile.’
U-Secretary Pompeo uphinde wathi kumgceke ukuba ukuhlonitshwa kwamalungelo abantu kuyinsika yentuthuko yeMelika njengesizwe njalo kudlala indima eqhakathekile kakhulu nxa kukhangelwa ubudlelwano balelizwe lamanye amazwe womhlaba.
“Njengezizalwane zeMelika siyaziqhenya ngenxa yembali yokuhlonipha lokuqakathekisa ilungelo loluntu, silandela ezithende zabalwela inkululeko yaleli lizwe. Ngokunjalo kuqhakathekile kakhulu ukuthi wonke umuntu ofisa ukuba lobudlelwano lathi, laye kumele ahloniphe ilungelo likazulu.”
UPompeo, uthi ulethemba lokuthi eleMelika lingaqhubekela phambili lilondoloza amalungelo oluntu, ngendlela elenza ngalo okwamanje, iza yisibonelo esihle kwamanye amazwe, ukuze abelakho ukwenza into efanayo.
See all News Updates of the Day
- Sithandekile Mhlanga
UMnu. Dube Munkombwe weMDC-T Usekubandla leZANU PF
Owayelilunga leMDC-T uMnu. Dube Munkombwe usetshiye ibandla eliphikisayo waya kwele ZANU PF lapho emukelwe yiziphathamandla zebandla elibusayo ngoMvulo ezigoqela oMnumzana Mike Bimha lo Obert Mpofu.
Bemukelwe njalo nguMnu. Blessing Chebundo, umkhokheli wogatsha olubona ngabavela kwamanye amabandla abangena kuZANU PF, olubizwa ngokuthi yiKumusha Home Ekhaya Program, elomsekeli wakhe uNkosazana Memory Sibanda.
UMnu. Munkombwe oleminyaka engamatshumi amane lanhlanu-45, uthi ungomunye wababumba ibandla leMDC ngomnyaka ka 1999 njalo wake waba ngumgcinisihlalo weBinga Rural District Council wasephatha ezinye izikhundla zobukhokheli kugatsha lwabatsha eBinga, koBulawayo, leMatabeland North.
Utshele iStudio 7 ukuthi akukho okumqoka asekufezele abantu selokhe wabalilunga lebandla eliphikisayo ngakho useuna ukusebenza lebandla leZANU PF athuthukise impilo zabantu.
Kuconjwa Iwofisi yeCCC Ngombala Oluhlaza Okwesibhakabha Ngabacatshangelwa Ukuba Basekela uChamisa
Amawofisi ebandla leCitizens Coalition for Change koBulawayo aseconjwe ngombala oluhlaza okwesibhakabhaka ngabacatshangelwa ukuba ngabalandeli bebandla leli abasekela uMnu. Nelson Chamisa asanda kulitshiya. Amawofisi la abependwe ngombala olithanga.
Ukuconjwa kwamawofisi la kumangalise abalandeli baka Chamisa abasekela uMnu. Sengeo Tshabangu labanye bakhe. Sehlulekile ukuxhumana lesikhulumeli sebandla leli uMnu Promise Mkhwananzi obengadobhi umakhalekhwikhwini wakhe laye okubikwa ukuba usesithi nguye osekhokhela elinye icele leCCC.
Sixoxe loMnu Pashor Sibanda owakhitshiswa nguTshabangu edale lephalamende othi umbala lo ngokunye kwalokhu ababekusebenzisa ibandla leli lisakhokhelwa nguChamisa.
UMnu. Charles Phiri osekela uChamisa kukhanye ubekwamukela okwenzakalayo njalo esithi umkhokheli wakhe wenze kahle ukusuka kubandla leli.
UMnu Alfred Dzirutwe, isikhulumeli secela leCCC elikhokhelwa nguTshabangu uthi sebemangalele emthethwandaba abantu abacombe isakhiwo sabo ngombala oluhlaza okwesibhakabhaka.
UMnu. Dougas Mwonzora umkhokheli weMDC-T laye udla amalahle esithi isakhiwo lesi ngesebandla lakhe ngakho-ke akumelanga sibangwe ngabakubandla leCCC. lsakhamuzi sakoBulawayo uMnu Ben Moyo laye uveza umbono wakhe ngokwenzakalayo kubandla leCCC.
Isakhamuzi sako Bulawayo uMnu. Maluba Mhlaba usola okwenzakala kuCCC lenyathela lokucomba amawofisi esiba yisibhakabhaka.
Kukhanya sekulamacela amanengi aweCCC agoqela okukhanya engani likhokhelwa nguMnu. Welshman Ncube, uMnu. Jameson Timba loMkhwanazi. Lokhu kulandela ukutshiywa kwebndla leli nguChamisa olakho ukusungula elitsha. UNcube usanda kukhokhela umhlangano omkhulu oweCCC lapho obekuhlolisiswa isimo sebandla leli. Kuthehwe izinqumo ezimbalwa emhlanganweni lo okugoqela ukuba bonke abakhethwa okusemthethweni kumele behlale ezikhundleni zabo. Kwelinye icele bathi ibandla leli kumele likhokhelwe nguTimba. UChamisa laye ulakho ukusungula elakhe.
Abantu Abedlula Inkulungwane Ezintathu - 3,004 Batholakala Belegciwane leCOVID-19 eZimbabwe
Uhlangothi lwezempilakahle luthi kulabantu abayisithupha ababulewe ngumkhuhlane weCOVID-19 izolo eZimbabwe kwathi abedlula inkulungwane ezintathu – 3.004 bahlolwe batholakala belegciwane leCoronavirus.
Lubikwa njalo ukuthi umkhuhlane lo usubulele abedlula inkulungwane ezine lengxenye – 4,735 kusukela ngoMbimbitho nyakenye.
Luthi asebehlatshwe ijekiseni yakuqala yokuzivikela kumkhuhlane weCOVID-19 eZimbabwe bafika phose izigidi ezine – 3.9 million kuthi-ke asebehlatshwe eyesibili befika phose izigidi ezintathu – 2.9 million.
Uhulumende uthi umkhakha omutsha oweOmicron uyamemetheka elizweni. USikhwicamfundo Solwayo Ngwenya, osebenza esibhedlela seMpilo, uthi abantu kumele bazivikela kumkhuhlane lo.
Forum