Svoboda | Graniru | BBC Russia | Golosameriki | Facebook

amalinks wokungena

Breaking News

UPatrick Chinamasa Uthi Abadabuka eZimbabwe Abahlala Kwamanye Amazwe Kabakhohlwe Ngokuvota Bephandle Kwelizwe


Patrick Chinamasa
Patrick Chinamasa

UMnu. Patrick Chinamasa, obambe okwesikhatshana isikhundla sokhangelane lenhlelo zokukhanga abantu ukuba bangene kubandla leZanu PF, uthi uhulumende kasoze avumele ukuba abahlala emazweni bevote kukhetho lweZimbabwe bephandle kwelizwe.

Lokhu sekucaphule abanengi abahlala kwamanye amazwe abafisa ukuvota kukhetho lwelizwe.

UChinamasa, owethule lokhu namuhla emsakazweni weZimbabwe Broadcasting Corporation ngesikhathi ekhuluma lentathelizindaba eHarare, uthe kumele wonke umuntu ofisa ukuvota ahambe eZimbabwe ayebhalisela ukuvota.

Uthe kungeke kwenzakale ukuba kubelendawo zokuvota emazweni lapho abadabuka eZimbabwe abahlala khona ngenxa yokuthi akukho emthethweni. Uphinde wathi kunzima ukuba ibandla lakhe likhankase emazweni atshiyeneyo ngoba inkokheli yebandla leli yafakelwa izijeziso zenotho ngamazwe entshonalanga.

Abahlala emazweni atshiyeneyo bathi kuyadanisa okwethulwe nguChinamasa. Omunye wabo nguNkosikazi Siphiwe Sithole, ohlala kwele Ireland.

Lokhu kusekelwa nguMnu. Nkululeko Gwabalanda Mathe, ohlala eGoli kwele South Africa, othi kusobala ukuba ibandla leZanu PF lisesaba abadabuka eZimbabwe abahlala kwamanye amazwe.

UMnu. Den Moyo, ohlala kwele Melika, laye uthi imbi kakhulu inkulumo kaChinamasa ngoba abadaduka eZimbabwe bathuthukisa umnotho welizwe.

UMoyo uthi bake bakhulumisana ngalokhu loMongameli Emmerson Mnangagwa.

Kodwa uMnu. Elifas Mashava, okubandla lebandla leZanu PF, usekela okukhulunywe nguChinamasa.

Imibono yakhe isekelwa nguMnu. Joseph Tshuma, okubandla elibusayo.

Isisekelo sombuso welizwe leZimbabwe sikubeka sobala kusigaba sokungamatshumi ayisithupha lasikhombisa – kuSection 67 ukuba zonke izizalwane zeZimbabwe zilelungelo lokuvota.

XS
SM
MD
LG