WASHINGTON DC - Kubotshwe ilunga leZanu PF eMutare lisetheswa icala lokuthi uRobert Mugabe wayebusa ngcono kuloMongameli Emmerson Mnangagwa.
Amaphepha aphambi kwenkantolo aveza ukuthi umsolwa, uMalcom Masarira, uleminyaka yokuzalwa engamatshumi amathathu lambili, 32. Wabotshiswa ngusomabhizimusi uMnu Isau Mupfumi laye olilunga leZanu PF.
Amapholisa athi uMasarira wathumela umbiko ngeWhatsApp kuqembu labasekeli bebandla elibusayo esithi umuyi, uMugabe wayengumbusi olalela izikhalazo zabantu, okuyinto athi yehlula umnangagwa.
Ngokunjalo, amapholisa athi umsolwa wathuka uMongameli Mnangagwa ngokumqathanisa loMugabe.
Ingcwethi ehlaziya ezombusazwe uMnu Zenzele Ndebele utshele iStudio 7 ukuthi ukubotshwa kukaMasarira kuveza sobala ukuthi umbusi kaMnangagwa mubi njengokaMugabe.
Your browser doesn’t support HTML5
Ingxoxo loMnu Zenzele Ndebele
Isikhulumeli samapholisa uMnu Paul Nyathi ubengadobhi ucingo lwakhe.