ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ։ Տիեզերք թռչելու համար տոմսերի գները ներկայումս շատ թանկ են, սակայն ժամանակի ընթացքում դրանք կնվազեն։ Ինչպես տեղեկացնում է «Արմենպրես»-ը, STARMUS փառատոնի շրջանակում այս մասին ասաց տիեզերագնաց և ինժեներ Ջորջ Նիլդը, ով զբաղվում է տիեզերական զբոսաշրջությամբ և մասնավոր չվերթով մեկնել է տիեզերք։ 

«Այո, դուք կարող եք գնել տոմսը դեպի տիեզերք թռչելու համար։ Իհարկե, այն շատ թանկ է, սակայն գները ժամանակի ընթացքում կնվազեն, ուստի կարող եք ունենալ այդ ճամփորդությունը։ Իհարկե, դժվար է այս պահին հստակ ասել, թե երբ այդ հնարավորությունը կտրվի, բայց ինչպես օդանավի տոմսերի դեպքում է, երբ ի սկզբանե դրանք բավականին թանկ էին, սակայն ժամանակի ընթացքում գները իջան և հասանելի դարձան մարդկանց համար, նույնը կլինի տիեզերական զբոսաշրջության դեպքում գալիք տասնամյակների ընթացքում ։ Կարծում եմ, որ առաջիկայում հնարավորություն կունենաք ձեզ թույլ տալ նման ճամփորդություն»,- ասաց Նիլդը։