ប្រទេសរុស្ស៊ីបានបញ្ជាក់នៅថ្ងៃចន្ទនេះថា ខ្លួនបានរារាំងការវាយប្រហារដោយដ្រូនរបស់អ៊ុយក្រែននៅក្នុងតំបន់ Rostov នៅភាគនិរតីប្រទេស ខណៈពេលដែលអគ្គិភ័យនៅរោងចក្រថាមពលមួយកន្លែងនៅក្នុងតំបន់នោះបានបង្អាក់សេវាផ្គត់ផ្គង់ថាមពល។
ក្រសួងការពារជាតិរុស្ស៊ីបានបញ្ជាក់ថា ប្រព័ន្ធការពារដែនអាកាសរបស់រុស្ស៊ីបានបាញ់ទម្លាក់ដ្រូនទាំង ១១ គ្រឿងរបស់អ៊ុយក្រែនដែលពាក់ព័ន្ធនៅក្នុងការវាយប្រហារនេះ។
អភិបាលតំបន់ Rostov លោក Vasily Golubev បានបញ្ជាក់តាម Telegram ថាមានភ្លើងឆេះនៅរោងចក្រថាមពល Novocherkassk ដោយបណ្ដាលឱ្យម៉ាស៊ីនថាមពលពីរគ្រឿងរបស់ខ្លួនលែងដំណើរការបណ្ដោះអាសន្ន។
ក្រុមហ៊ុនអគ្គិសនី OGK-2 ដែលជាប្រតិបត្តិកររោងចក្រនេះ បានរាយការណ៍ថាមិនមានអ្នករងគ្រោះនៅក្នុងឧប្បត្តិហេតុនេះទេ និងបានបញ្ជាក់ថាគេកំពុងវាយតម្លៃឧបករណ៍នៅឯរោងចក្រនោះថាតើមានការខូចខាតឬក៏អត់។
យោធាអ៊ុយក្រែនបានលើកឡើងនៅថ្ងៃចន្ទនេះថា ប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូន ៨ គ្រឿងក្នុងចំណោម ៩ គ្រឿងដែលរុស្ស៊ីបានប្រើនៅក្នុងការវាយប្រហារលើអ៊ុយក្រែនកាលពីយប់មិញ។
កងទ័ពជើងអាកាសអ៊ុយក្រែនបាននិយាយថា ការបាញ់ទម្លាក់ដ្រូនទាំងនេះបានធ្វើឡើងនៅលើតំបន់ Mykolaiv និងតំបន់ Odesa។
អភិបាលតំបន់ Odesa លោក Oleh Kiper បានរាយការណ៍អំពីការខូចខាតចំពោះហេដ្ឋារចនាសម្ព័ន្ធថាមពល ហើយលោកបាននិយាយថា ផ្នែកខ្លះនៃតំបន់នោះមិនមានសេវាអគ្គិសនី។
ក្រុមហ៊ុន DTEK ដែលជាក្រុមហ៊ុនថាមពលកំពូលរបស់អ៊ុយក្រែន បានបញ្ជាក់តាម Telegram ថា ការវាយប្រហាររបស់រុស្ស៊ីបានធ្វើឱ្យខូចខាតរោងចក្រថាមពលដែលមានវ៉ុលខ្ពស់មួយកន្លែង។ ក្រុមហ៊ុននេះបានបន្ថែមថា ទោះបីជាសេវាទៅកាន់រោងចក្រសំខាន់ៗត្រូវបានស្ដារនៅថ្ងៃចន្ទនេះក៏ដោយ ក៏ការបិទគ្រាអាសន្នដែលធ្វើឱ្យសេវាមានកម្រិតនៅក្នុងតំបន់នោះនៅតែមាននៅឡើយ។
ការវាយប្រហារនេះនេះគឺជាការវាយប្រហារថ្មីរបស់រុស្ស៊ីដែលធ្វើឱ្យខូចខាតដល់ហេដ្ឋារចនាសម្ព័ន្ធថាមពលរបស់អ៊ុយក្រែន ដែលក្នុងនោះរួមមានទាំងរលកនៃការវាយប្រហារតាំងពីថ្ងៃសុក្រសប្ដាហ៍មុនមកផងដែរ ដែលបានជំរុញឱ្យក្រសួងថាមពលអ៊ុយក្រែននិងក្រុមហ៊ុនចែកចាយថាមពលនានាផ្អាកការនាំចេញថាមពលនិងបង្កើនការនាំចូលអគ្គិសនី។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថាកាលពីយប់ថ្ងៃអាទិត្យថា ប្រព័ន្ធការពារដែនអាកាសរបស់ប្រទេសលោកត្រូវការ «ការពង្រឹងឱ្យបានខ្លាំងក្លា» នៅពេលដែលអ៊ុយក្រែនប្រឈមនឹងការវាយប្រហារតាមផ្លូវអាកាសជាបន្តបន្ទាប់របស់រុស្ស៊ី៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន Reuters ទីភ្នាក់ងារសារព័ត៌មាន AP និងទីភ្នាក់ងារសារព័ត៌មាន AFP។
