សហរដ្ឋអាមេរិកកាលពីថ្ងៃពុធម្សិលមិញបានសម្តែងនូវក្តីបារម្ភជុំវិញការកាត់ទោសទ្រង់ទ្រាយធំមួយរបស់កម្ពុជាទៅលើក្រុមមន្ត្រីគណបក្សប្រឆាំង ដែលក្នុងនោះក៏រួមមានទាំងសកម្មជនខែ្មរអាមេរិកាំងម្នាក់ផងដែរ។ សហរដ្ឋអាមេរិកព្រមានថានេះជាការបង្ហាញនូវសកម្មភាព ដែលបំផ្លាញលទ្ធិប្រជាធិបតេយ្យ។
តុលាការរាជធានីភ្នំពេញកាលពីថ្ងៃអង្គារបានកាត់ទោសមន្ត្រីគណបក្សប្រឆាំងប្រមាណចំនួន ៦០ នាក់ នៅក្នុងសវនាការទ្រង់ទ្រាយធំមួយ ដែលការណ៍នេះកើតមានឡើង ខណៈដែលលោកនាយករដ្ឋមន្ត្រី ហ៊ុន សែន ដែលបានកាន់តំណែងជាយូរមកហើយនោះ និងដែលទើបតែបានចូលរួមក្នុងកិច្ចប្រជុំពិសេសអាមេរិក-អាស៊ានក្នុងរដ្ឋធានីវ៉ាស៊ីនតោនកាលពីខែមុន ធ្វើការការបង្រ្កាបទៅលើក្រុមអ្នកប្រឆាំងតវ៉ា នៅមុនការបោះឆ្នោតជាតិនៅឆ្នាំក្រោយ។
អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បាននិយាយនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិកមានការបារម្ភជាខ្លាំង ចំពោះការកាត់ទោសទ្រង់ទ្រាយធំមួយកាលពីថ្ងៃទី១៤ ខែមិថុនាកន្លងទៅនេះទៅលើសកម្មជនគណបក្សប្រឆាំងនៅក្នុងប្រទេសកម្ពុជា ដែលក្នុងចំណោមនោះក៏មានមេធាវីខ្មែរអាមេរិកាំងកញ្ញា សេង ធារី ម្នាក់ផងដែរ»។
លោក Price បានថ្លែងបន្ថែមទៀតថា ការកាត់ទោសនេះ«គឺជាឧទាហរណ៍ចុងក្រោយបង្អស់នៃការគំរាមកំហែង ការបំភិតបំភ័យ និងការធ្វើទុក្ខបុកម្នេញទៅលើគណបក្សនិងមេដឹកនាំនយោបាយប្រឆាំង»។ លោកថ្លែងទៀតថា៖ «សកម្មភាពទាំងនេះបំផ្លាញលទ្ធិប្រជាធិបតេយ្យពហុបក្ស និងនីតិរដ្ឋ»។
ចុងចោទនៅក្នុងសវនាការនោះ បានទទួលរងការចោទប្រកាន់មួយចំនួន ដែលរាប់ចាប់តាំងពីអំពើក្បត់ជាតិ រហូតដល់ការញុះញង់និងការឃុបឃិត ជុំវិញគម្រោងផែនការវិលត្រឡប់មកកាន់ប្រទេសកម្ពុជាវិញមិនបានជោគជ័យរបស់មេដឹកនាំគណបក្សប្រឆាំង គឺលោក សម រង្ស៊ី កាលពីឆ្នាំ២០១៩ ហើយដែលត្រូវបានរដ្ឋាភិបាលកម្ពុជាចាត់ទុកថាជាសកម្មភាពមួយដែលប៉ុនប៉ងមិនបានសម្រេចក្នុងការទម្លាក់លោក ហ៊ុន សែន ចេញពីអំណាច។
ខណៈពេលដែលមនុស្សមួយចំនួន ដែលត្រូវកាត់ទោសនោះ ធ្លាប់ជាមន្ត្រីជាន់ខ្ពស់នៃគណបក្សសង្គ្រោះជាតិ ដែលគណបក្សនេះត្រូវបានតុលាការរំលាយទៅហើយ ហើយដែលបានធ្វើការរៀបចំដោយផ្ទាល់ចំពោះគម្រោងការនៃការវិលត្រឡប់របស់មេដឹកនាំគណបក្សប្រឆាំងនោះ មនុស្សជាច្រើនផ្សេងទៀតត្រូវបានកាត់ទោស ដោយសារតែពួកគេគ្រាន់តែបានបង្ហោះសារគាំទ្រការវិលត្រឡប់នោះនៅលើបណ្តាញសង្គមតែប៉ុណ្ណោះ។
លោក Price និយាយថា សហរដ្ឋអាមេរិកអំពាវនាវឱ្យអាជ្ញាធរកម្ពុជាដោះលែងជនទាំងអស់នោះ ដែលក្នុងនោះក៏មានកញ្ញា សេង ធារី ផងដែរ ដែលត្រូវបានឃុំឃាំងដោយអយុត្តិធម៌ ដើម្បីការពារសេរីភាពនៃការបញ្ចេញមតិ សេរីភាពនៃការបង្កើតសមាគម និងសេរីភាពនៃការជួបប្រជុំដោយសន្តិវិធី»៕
