ອິສຣາແອລ ໄດ້ຮຽກຮ້ອງໃນວັນອາທິດວານນີ້ ໃຫ້ສະພາຄວາມໝັ້ນຄົງ ສະຫະປະຊາຊາດ ປະຕິບັດມາດຕະການລົງໂທດ ແລະ ສະກັດກັ້ນອີຣ່ານ ຫຼັງຈາກການໂຈມຕີທາງທະຫານຂອງອີຣ່ານ ຕໍ່ອິສຣາແອລ ທີ່ບໍ່ເຄີຍມີມາກ່ອນ ທີ່ເຕຮາຣ່ານ ກ່າວວ່າ ເປັນການຕອບໂຕ້ຕໍ່ການໂຈມຕີຂອງອິສຣາແອລ ທີ່ສົງໄສວ່າ ໄດ້ໂຈມຕີສະຖານທູດຂອງຕົນໃນຊີເຣຍ ໃນຕົ້ນເດືອນນີ້.
ທ່ານ ກີລາດ ເອີດານ (Gilad Erdan) ທູດພິເສດຂອງອົງການສະຫະປະຊາຊາດຂອງອິສຣາແອລ ກ່າວຕໍ່ສະພາຄວາມໝັ້ນຄົງວ່າ “ມື້ນີ້, ສະພາຕ້ອງດຳເນີນການປະນາມ ອີຣ່ານ ສຳລັບການກໍ່ການຮ້າຍຂອງພວກເຂົາ; ກະຕຸ້ນກົນໄກການຕອບໂຕ້ກັບ ແລະ ກຳນົດມາດຕະການລົງໂທດ ທີ່ເຮັດໃຫ້ອ່ອນແອລົງອີກຄັ້ງ; ກຳນົດໃຫ້ກອງກຳລັງພິທັກປະຕິວັດຂອງອີຣ່ານ ເປັນອົງການກໍ່ການຮ້າຍ. ຕ້ອງມີການດຳເນີນການໃນທັນທີ — ບໍ່ແມ່ນເພື່ອຜົນປະໂຫຍດຂອງອິສຣາແອລ, ບໍ່ແມ່ນເພື່ອຜົນປະໂຫຍດຂອງພາກພື້ນ, ແຕ່ເພື່ອຜົນປະໂຫຍດຂອງໂລກ.”
ອິສຣາແອລ ໄດ້ຮ້ອງຂໍໃຫ້ມີກອງປະຊຸມສຸກເສີນ ຫຼັງຈາກການໂຈມຕີໂດຍກົງໃສ່ດິນແດນຂອງຕົນ ໂດຍອີຣ່ານ ໂດຍໄດ້ກ່າວວ່າ ລວມມີເຮືອບິນບໍ່ມີຄົນຂັບ 170 ລຳ, ລູກສອນໄຟຂີປະນາວຸດ 120 ລູກ ແລະລູກສອນໄຟນຳວິຖີ 30 ລູກ. ອິສຣາແອລ ກ່າວວ່າ ການລະບົບປ້ອງກັນໄພທາງອາກາດຂອງຕົນ ພ້ອມກັບສະຫະລັດ ແລະພັນທະມິດອື່ນໆ ໄດ້ຍິງອາວຸດທັງຫຼາຍເຫຼົ່ານັ້ນຕົກ 99 ເປີເຊັນ.
ທ່ານ ເອິດານ (Erdan) ຕຳໜິຕິຕຽນສະພາວ່າ ບໍ່ຟັງຄຳເຕືອນຂອງ ອິສຣາແອລ ກ່ຽວກັບອີຣ່ານ ໃນຕະຫຼອດຫຼາຍປີທີ່ຜ່ານມາ. ທ່ານກ່າວວ່າ ປະຊາຄົມໂລກໄດ້ມິດງຽບຕໍ່ການເພີ້ມຂຶ້ນຂອງ "ລັດທິອິສລາມຊີໄອ," ແຕ່ດ້ວຍການໂຈມຕີໂດຍກົງຂອງອີຣ່ານຕໍ່ອິສຣາແອລ, ລະບອບການປົງຄອງດັ່ງກ່າວ ຈຶ່ງໄດ້ຖືກເປີດເຜີຍໃນຕອນນີ້.
ທູດອິສຣາແອລກ່າວວ່າ "ໃນຂະນະທີ່ໜ້າກາກຂອງອີຣ່ານຖືກເປີດອອກ, ຄວາມໃຈເຢັນຂອງໂລກກໍຕ້ອງຫຼຸດລົງເຊັ່ນກັນ, ເປີດຫນ້າກາກອອກ ແລ້ວກໍຕ້ອງໃສ່ນວມມວຍ."
ທ່ານກ່າວວ່າ ອີຣ່ານໄດ້ “ຂ້າມເສັ້ນສີແດງທຸກເສັ້ນ” ແລະ ອິສຣາແອລ ຂໍສະຫງວນສິດຕາມກົດໝາຍໃນການຕອບໂຕ້.
ທູດພິເສດຂອງອີຣ່ານ ກ່າວວ່າ ພວກເຂົາເຈົ້າບໍ່ມີທາງເລືອກອື່ນ ນອກຈາກໃຊ້ສິດໃນການປ້ອງກັນຕົນເອງ ຫຼັງຈາກການໂຈມຕີໃສ່ສະຖານທູດຂອງພວກເຂົາ ໃນນະຄອນຫຼວງ ມາດາກັສ (Damascus) ໃນວັນທີ 1 ເມສາ ແລະ ສະພາຄວາມໝັ້ນຄົງຫຼົ້ມແຫຼວໃນການປະນາມຢ່າງເປັນທາງການ.
ຟໍຣັມສະແດງຄວາມຄິດເຫັນ