ນາຍພົນທີ່ກຳລັງປົກຄອງມຽນມາ ໄດ້ກ່າວໃນວັນພຸດວານນີ້ວ່າລັດຖະບານທະຫານຈະຄອງອຳນາດພຽງຊົ່ວຄາວເທົ່ານັ້ນ ດ້ວຍເປົ້າໝາຍຂອງການເສີມຂະຫຍາຍປະຊາທິປະໄຕ, ແລະ ທ່ານໄດ້ຮຽກຮ້ອງສຳລັບຄວາມສາມັກຄີລະຫວ່າງປະຊາຊົນ ແລະ ທະຫານໃນການຕໍ່ສູ້ກັບກຸ່ມຕິດອາວຸດທີ່ພະຍາຍາມຈະທຳລາຍແຜນການເພື່ອຈັດການເລືອກຕັ້ງ.
ໃນການກ່າວຄຳປາໄສຕໍ່ການເດີນສວນສະໜາມວັນກອງກຳລັງຕິດອາວຸດນັ້ນ, ນາຍພົນອະວຸໂສ ມິນ ອອງ ລາຍ, ຜູ້ທີ່ໄດ້ນຳພາການກໍ່ລັດຖະປະຫານໃນປີ 2021, ໄດ້ກ່າວວ່າພວກຄູ່ແຂ່ງຂອງທ່ານແມ່ນໄດ້ຮັບການໜູນຫຼັງຈາກຕ່າງປະເທດ ແລະ ພະຍາຍາມທີ່ຈະທຳລາຍປະເທດ ແລະ ທຳລາຍແຜນການທີ່ນຳເອົາ ມຽນມາ ກັບໄປສູ່ການປົກຄອງແບບປະຊາທິປະໄຕ.
ທ່ານໄດ້ກ່າວຕໍ່ທະຫານຫຼາຍຮ້ອຍຄົນໃນນະຄອນຫຼວງ ເນປີດໍ ວ່າ “ກອງທັບ, ກອງກຳລັງຕຳຫຼວດ ແລະ ທະຫານບ້ານຂອງປະຊາຊົນແມ່ນກຳລັງເຮັດວຽກເພື່ອນຳເອົາສັນຕິພາບ ແລະ ຄວາມໝັ້ງຄົງກັບຄືນມາ. ພວກເຮົາຕ້ອງມີຄວາມສາມັກຄີກັນລະຫວ່າງກອງທັບ ແລະ ປະຊາຊົນ.”
ກອງທັບແມ່ນໄດ້ປະເຊີນກັບສິ່ງທ້າທາຍທີ່ໃຫຍ່ທີ່ສຸດນັບຕັ້ງແຕ່ໄດ້ຍຶດອຳນາດຄັ້ງທຳອິດໃນປະເທດອະດີດອານານິຄົມຂອງ ອັງກິດ ໃນປີ 1962, ໂດຍໄດ້ຕໍ່ສູ້ໃນຫຼາຍແນວລົບເພື່ອຍັບຢັ້ງການລຸກຮື້ຂຶ້ນໃນຫຼາຍພາກສ່ວນຂອງປະເທດ ແລະ ຮັກສາສະຖຽນລະພາບດ້ານເສດຖະກິດທີ່ໄດ້ຊຸດໂຊມນັບຕັ້ງແຕ່ການກໍ່ລັດຖະປະຫານ.
ມຽນມາ ແມ່ນຕິດຢູ່ໃນສົງຄາມກາງເມືອງລະຫວ່າງກອງທັບໃນດ້ານນຶ່ງ ແລະ ອີກດ້ານນຶ່ງ, ແມ່ນພັນທະມິດທີ່ບໍ່ແໜ້ນແຟ້ນຂອງກຸ່ມກະບົດຊົນເຜົ່າກຸ່ມນ້ອຍ ແລະ ການເຄື່ອນໄຫວຕໍ່ຕ້ານຕິດອາວຸດທີ່ໄດ້ເກີດຂຶ້ນມາຍ້ອນການປາບປາມທີ່ນອງເລືອດຂອງລັດຖະບານທະຫານຕໍ່ການປະທ້ວງຕໍ່ຕ້ານການກໍ່ລັດຖະປະຫານ.
ຟໍຣັມສະແດງຄວາມຄິດເຫັນ