ນັບຕັ້ງແຕ່ ທ່ານທັກສິນ ຊິນນະວັດ ໄດ້ຮັບການປ່ອຍໂຕຈາກໂຮງໝໍຕຳຫຼວດຢູ່ບາງກອກໃນທ້າຍເດືອນກຸມພາທີ່ຜ່ານມາ, ກໍສາມາດເຫັນໄດ້ຢ່າງແຈ່ມແຈ້ງເຖິງການສະໜັບສະໜຸນຈາກສັງຄົມຕໍ່ອະດີດນາຍົກລັດຖະມົນຕີຂອງໄທ.
ທ່ານທັກສິນ ອາຍຸ 74 ປີ ໄດ້ຮັບການຕ້ອນຮັບແບບວິລະຊົນ ໃນວັນອັງຄານວານນີ້ ເມື່ອທ່ານເດີນທາງໄປຢ້ຽມຢາມສໍານັກງານໃຫຍ່ຂອງພັກເພື່ອໄທ ໂດຍເປັນພັກທີ່ທ່ານກໍ່ຕັ້ງຂຶ້ນມາ, ເຊິ່ງປັດຈຸບັນ ເປັນພັກທີ່ນໍາພາຄະນະລັດຖະບານຂອງໄທ.
ແຕ່ການກັບຄືນໄປປະເທດພາຍຫຼັງທີ່ເນລະເທດຕົນເອງໄປຢູ່ຕ່າງປະເທດໄດ້ 16 ປີ ກໍມີແຕ່ຄໍາຖາມທີ່ເພີ້ມຂຶ້ນກ່ຽວກັບວ່າ ໃນຂະນະນີ້ ທ່ານ ທັກສິນ ມີອຳນາດທາງການເມືອງຫຼາຍປານໃດ.
ສະມາຊິກສະພາຈາກພັກເພື່ອໄທໄດ້ຢືນຢັນການປາກົດໂຕຂອງ ທ່ານ ທັກສິນ ຢູ່ທີ່ສໍານັກງານໃຫຍ່ຂອງພັກ, ຕິດຕາມດ້ວຍການໄປຢ້ຽມຢາມບ້ານເກີດຂອງທ່ານຢູ່ຈັງຫວັດຊຽງໃໝ່, ບ່ອນທີ່ທ່ານໄດ້ຮັບການຕ້ອນຮັບໂດຍຝູງຊົນທີ່ໃຫ້ການສະໜັບສະໜຸນນັ້ນ ບໍ່ມີຄວາມໝາຍໃດໆທາງດ້ານການເມືອງ.
ແນວໃດກໍຕາມ, ຜູ້ຊ່ຽວຊານກ່າວວ່າ ຄວາມຈິງໃນການປາກົດໂຕອີກຄັ້ງຂອງທ່ານ ເປັນພຽງການຊຸກຍູ້ໃຫ້ທ່ານຢູ່ໃນຖານະທີ່ມີອິດທິພົນທາງດ້ານການເມືອງເທົ່ານັ້ນ.
ທ່ານປຣະວິດ ໂຣດຈະນະພຣຶກ (Pravit Rojanaphruk) ນັກຂ່າວອາວຸໂສ ແລະນັກວິເຄາະທາງດ້ານການເມືອງ ກ່າວຕໍ່ VOA ວ່າ "ທ່ານທັກສິນ ກໍາລັງເຮັດໃຫ້ແນ່ໃຈວ່າ ທ່ານຈະບໍ່ຖືກປິດບັງ ໂດຍການໄປຢ້ຽມຢາມນະຄອນຊຽງໃໝ່ ອັນໄດ້ດຶງດູດການລາຍງານຂ່າວຢ່າງກວ້າງຂວາງໂດຍອົງການຂ່າວຕ່າງໆຂອງໄທ.
ຟໍຣັມສະແດງຄວາມຄິດເຫັນ