ລັດຖະບານທ່ານ ໄບເດັນ ໄດ້ພະຍາຍາມຜັກດັນດ້ານການທູດ ເພື່ອການເຈລະ ຈາກັບເກົາຫຼີເໜືອ ດ້ວຍຂໍ້ສະເໜີທີ່ເປີດເຜີຍຢ່າງຈະແຈ້ງ ໃນການມີສ່ວນຮ່ວມ ຫຼາຍຂຶ້ນກວ່າຄັ້ງອື່ນໆ ນັບຕັ້ງແຕ່ເຂົ້າມາບໍລິຫານປະເທດ.
"ພວກເຮົາຕ້ອງການການເຈລະຈາ, ແລະ ມີຫຼາຍການປຶກສາຫາລືທີ່ມີປະ ໂຫຍດ" ທີ່ອາດເກີດຂຶ້ນກັບສາທາລະນະລັດ ປະຊາທິປະໄຕ ປະຊາຊົນເກົາຫຼີ, ຫຼື ສປປ ເກົາຫຼີ, ອີງຕາມການກ່າວຂອງທ່ານນາງ ຈຸງ ພາກ (Jung Pak), ເຈົ້າໜ້າທີ່ອາວຸໂສຂອງ ສະຫະລັດ ຮັບຜິດຊອບກ່ຽວກັບເກົາຫຼີເໜືອ.
ປະເດັນສຳລັບການປຶກສາຫາລືເຫຼົ່ານັ້ນອາດລວມເຖິງການລົງໂທດ, ການຮ່ວມ ມືດ້ານມະນຸດສະທຳ ແລະ ມາດຕະການສ້າງຄວາມເຊື່ອໝັ້ນ, ທ່ານ ນາງ ພາກ ກ່າວໃນງານວັນທີ 18 ມີນາ ເຊິ່ງຈັດຂຶ້ນໂດຍສູນຍຸດທະສາດ ແລະການສຶກສາລະຫວ່າງປະເທດ ຫຼື CSIS ໃນນະຄອນຫຼວງວໍຊິງຕັນ.
ທ່ານນາງກ່າວຕື່ມວ່າ, ສະຫະລັດ ຕ້ອງການໃຫ້ ເກົາຫຼີເໜືອ ດຳເນີນມາດຕະ ການຫຼຸດຜ່ອນຄວາມສ່ຽງເພື່ອຫຼີກເວັ້ນການຄິດໄລ່ທີ່ຜິດພາດ ແລະການເພີ່ມຄວາມຮຸນແຮງໂດຍບໍ່ຕັ້ງໃຈ. ນອກຈາກນີ້, ສະຫະລັດ ຍັງຕ້ອງການໃຫ້ ພຽງຢາງ ດຳເນີນບາດກ້າວຊົ່ວຄາວເພື່ອກ້າວໄປສູ່ການປອດອາວຸດນິວເຄລຍ, ທ່ານນາງ ພາກ ໄດ້ອະທິບາຍໃນອີກງານນຶ່ງທີ່ຈັດຂຶ້ນໂດຍມູນນິທິ ຄາເນກີ ເພື່ອສັນຕິພາບສາກົນ (Carnegie Endowment for International Peace) ໃນວັນທີ 5 ມີນາ.
ທ່ານ ໂຈເຊບ ເດທຣານີ (Joseph DeTrani), ຜູ້ທີ່ດຳລົງຕຳແໜ່ງເປັນທູດພິເສດໃນການເຈລະຈາປອດນິວເຄລຍ 6 ຝ່າຍ ກັບເກົາຫຼີເໜືອ ແຕ່ປີ 2003 ຫາປີ 2006 ໃນລະຫວ່າງການປົກຄອງຂອງທ່ານ ຈອຣ໌ຈ ດັບເບີນຢູ ບຸສ (George W. Bush) ກ່າວຕໍ່ວີໂອເອຜ່ານທາງອີເມວໃນວັນສຸກທີ່ຜ່ານມາວ່າ ລັດຖະບານທ່ານ ໄບເດັນ ກຳລັງໃຊ້ວິທີການນີ້ໃນຕອນນີ້ ເຊິ່ງຂັດກັບວິທີການ ກ່ອນໜ້ານີ້ ເນື່ອງຈາກວ່າ “ຄວາມເຄັ່ງຕຶງຢູ່ແຫຼມເກົາຫຼີໄດ້ເພີ່ມຂຶ້ນຢ່າງບໍ່ຢຸດຢັ້ງ, ແລະ ຈະຕ້ອງພະຍາຍາມທຸກວິທີທາງເພື່ອຢຸດຕິການຂະຫຍາຍຄວາມຮຸນແຮງນີ້ ແລະ ຫຼຸດຜ່ອນຄວາມເຄັ່ງຕຶງນີ້.”
ຟໍຣັມສະແດງຄວາມຄິດເຫັນ