Bayden administrasiyasının yüksək səviyyəli rəsmiləri İsrailin müdafiə naziri Yoav Qallantı 1,4 milyondan çox fələstinli mülki şəxsin təhlükəsizlik axtardığı Qəzzanın cənubundakı Rəfah şəhərinə hücum planlarından əl çəkməyə çağırıb. ABŞ-la İsrail arasında gərginlik İsrailin HƏMAS-a qarşı 6 aydır davam edən müharibəsində İsrailin davranışı ilə bağlı yaranıb.
İsrailin Qəzzanın cənub şəhərinə hərbi hava kampaniyasını davam etdirdiyi üçün bazar ertəsi Rəfahdakı yaşayış binasına endirilən zərbə nəticəsində azı 16 nəfər ölüb.
İsrail liderləri qurudan planlaşdırdığı hücumu ilə daha da irəli getmək istəsə də, ABŞ rəsmiləri onlardan bunu etməmələrini xahiş edir. ABŞ müdafiə naziri Lloyd Austin: "Rəfahdakı 1,5 milyon fələstinli mülki vətəndaşın təhlükəsizliyi də ABŞ üçün əsas prioritetdir. İndi biz HƏMAS-ın məğlub olduğunu görmək məqsədimizi bölüşməyə davam edirik. Beləliklə, biz HƏMAS elementlərini hədəf almaq üçün alternativ yanaşmaları müzakirə edəcəyik".
ABŞ-ın müdafiə naziri Lloyd Austin İsrailin müdafiə naziri Yoav Qallantla görüşü zamanı da yaxınlaşan aclıq fonunda İsraili Qəzzaya daha çox humanitar yardımın keçirilməsinə icazə verməyə çağırıb. ABŞ-ın yardım və Rəfahla bağlı mesajı Qallanta digər administrasiya rəsmiləri, o cümlədən Dövlət katibi Antoni Blinken və Ağ Evin milli təhlükəsizlik məsələləri üzrə müşaviri Ceyk Sallivan tərəfindən çatdırılıb.
İsrailin xəbərdarlıqlara əməl edib-etməyəcəyi bəlli deyil. Qallant ABŞ-ın İsrailə silah tədarükünü artırmasını istəyib. İsrailin müdafiə naziri Yoav Qallant: "Biz həmçinin strateji məsələləri, İsrailin hərbi üstünlüyünü və imkanlarını təmin edəcək qurumumuz arasında mühüm əməkdaşlığı müzakirə edəcəyik".
ABŞ silahlarını almaq üçün istifadə etməli olduğu 3,3 milyard dollar da daxil olmaqla, Birləşmiş Ştatlar İsrailə ildə 4 milyard dollar yardım edir. Beynəlxalq Böhran Qrupu-ndan Brayan Finukeyn: "Həqiqətən də atəşkəslə bağlı razılığın əldə edilməsi üçün ABŞ həm birtərəfli, həm də çoxtərəfli qaydada öz güclü təsir imkanlarından istifadə etməlidir və bu, ən yaxşı ssenari olardı."
Bazar ertəsi ABŞ özünün diplomatik təsir imkanlarından istifadə edərək, bitərəf qaldı və BMT Təhlükəsizlik Şurasının dərhal atəşkəs və HƏMAS tərəfindən saxlanılan girovların azad edilməsi tələbi ilə qətnamə qəbul etməsinə icazə verdi.
Lakin İsrailə dəstəyini dayandırmağa çağıran etirazlara baxmayaraq, prezident Co Bayden hələ də hərbi yardım şərtləri barədə fikir bildirməyib.
Forum