Amerika do’konlarida sun’iy sut nega kam?

Valeri Farnsvort bugun Amerikada sun‘iy sut yetishmovchiligi muammosiga duch kelayotgan son-sanoqsiz amerikalik onalardan biri. Besh oylik o'g'li Xarrisonning ona sutiga allergiyasi bor. Bolani sun’iy oziqlantiradi.

“Birinchidan, topa olmaymiz. Topsak ham 20 foizga qimmat”, - deydi ona.

Sun’iy ozuqa yetishmovchiligi muammosi Amerikada bir yildan beri bor. Ta'minot zanjiri uzilgani yetmaganday, ishlab chiqaruvchi uch kompaniyaning biri yopildi. Mahsulotlari do’konlardan yig’ishtirib olindi. Ma'lumotlarga ko'ra, hozirda Amerika do'konlarida su’niy sut 43 foizga kam.

Ba’zi onalardagi sut miqdori bola ehtiyojini qondirmaydi. Jordan Beltran ana shunday muammoga duch kelgan onalardan. Ikkinchi farzandiga homilador. Hozirdan tashvishga tushmoqda.

“Sutim bo’lmasa-chi? Sun’iy sutga ehtiyoj tug’iladi. Kecha “Walmart” do’koniga bordim. Faqat bir quti sut ko’rdim. Har ehtimolga qarshi olish kerakmikan deb o’yladim”, - deydi ayol.

Mutaxassislar go’daklarga sun’iy sutdan boshqa oziq-ovqat mahsulotlari bermaslikni buyuradi.

“Menimcha, muhim infrastrukturaga nima kirishini qayta ko’rib chiqishimiz kerak. Xom neft va benzin ta’minotini ushlab turibmiz. Lekin muhim oziq-ovqat mahsulotlari, bolalar sun’iy suti ta’minotichi?”, - deydi Ta'minot zanjiri menejmenti bo’yicha mutaxassis Rudolf Loyshner.

Oq uy chora ko'rayotganini aytadi.

“Ishlab chiqaruvchilar bilan ishlayapmiz. Natijada, “Gerber” ishlab chiqarishni 50 foizga, “Reckitt” esa 30 foizga oshirdi, so'nggi to'rt hafta ichida oldingiga nisbatan ko’proq ishlab chiqarildi”, - deydi yaqingacha Oq uy matbuot kotibi bo’lgan Jen Psaki.

Shifokorlar duch kelgan ishlab chiqaruvchining mahsulotini xarid qilmaslikka chaqirmoqda.

“Ba’zida olayotgan mahsulotingiz haqiqiy ekaniga 100 foiz ishonchingiz komil bo’lmaydi. Ular idishni ochib, o’rniga boshqa narsa solishi mumkin”, - deydi pediatr shifokor Viktoriya Reygan.

AQSh Oziq-ovqat va farmatsevtika agentligi import qoidalarini yumshatmoqda. Kecha Yevropadan 39 tonna mahsulot olib kelindi. Oq uy tez orada ikkinchi partiyasi ham olib kelinishini ma’lum qildi.