Isirayeri, kuri uyu wa kabiri, yatangaje ko yakoze ibitero vy'indege z'ingwano mu ntumbero yo gusambura ibikoho bitatu vyakoreshejwe mu kurasa rokete 100 mu karere k’imisozi ya Golan.
Ukurasana ku mpande zompi vyateye impungenge amakungu ko ingwano hagati ya Isirayeri n’umurwi Hamas ishobora gukwiragira mu bindi bice vy’akarere ko mu buseruko bwo hagati y’isi.
Isirayeri, kuri uyu wa kabiri, yatangaje kandi ko yakoze ibitero vy’indege z’ingwano mu karere ka Khan Younis, mu bumanuko bw’intara ya Gaza. Ni mu gihe iriko igerageza kubandanya ibitero vyayo mu ntumbero yo kuzimanaganya umurwi Hamas.
Isirayeri, ku musi wa mbere, yaratangaje ko ibitero vy’indege z’ingwano yakoze mu ntara ya Gaza mu mpera z’indwi irangiye, vyahiga umutegetsi akomeye mu vya gisirikare w’umurwi Hamas. Yamara iracariko iratohoza niba yarishwe muri ivyo bitero.
Ivyo bitero vyakozwe mu kibanza Isirayeri yibaza ko uwo mutegetsi, yitwa Marwan Issa, yari yihishijemwo. Umuvugizi w’igisirikare ca Isirayeri, Amiral Daniel Hagari, ku musi wa mbere, yatangaje ko ivyo bitero vyabaye hagati yo ku musi wa gatandatu no ku musi w’Imana urangiye.
Isirayeri yagiriza Marwan Issa ko ari umwe mu bategetsi bakomeye b’umurwi Hamas bateguye ibitero vy’iterabwoba vyo kw’itariki 7 y’ukwezi kw’icumi mu mwaka urangiye w’i 2023.
Muri iki gihe kandi, ishirahamwe mpuzamakungu ONU ryatangaje ko ikibazo c’ibifungurwa gitera gikomera kurushiriza mu ntara ya Gaza. Ubwato butwaye itoni 200 y’imfahanyo yavuye kuri uyu wa kabiri mw’izinga rya Shipure, igana intara ya Gaza iciye mw’ibahari Mediterane.
Emira Zunze Ubumwe z’Abarabu, ishirahamwe rijejwe gutabara, Proactiva Open Armas ryo muri Espanye n’ishirahamwe rijejwe gutabara, World Central Kitchen ni yo yakoreye hamwe muri ico gikorwa co gutabara abanyagihugu bo mu ntara ya Gaza. (VOANEWS)
Forum