Umurwi ujejwe gusuzuma ivyavuye mu matora muri Senegali wemeje ko Bassirou Diomaye Faye ari we yegukanye intsinzi mu matora ya prezida w’ico gihugu.
Bassirou Diomaye Faye, yaronse amajwi 54,28%. Amadou Ba, yari yaserukiye umugambwe uri ku butegetsi, aza ubwa kabiri n’amajwi 35,79%. Uwa gatatu yaserukiye umugambwe w’ubumwe n’ubwiyunge yaronse amajwi 2,8%.
Intsinzi ya Bassirou Diomaye Faye, yagiye mu matora inyuma y’iminsi cumi avuye mu gasho, hasigaye ko yemezwa n’abagize umurwi ujejwe kubahiriza ibwirizwa nshingiro rya Senegali kugira ibe ntabanduka.
Abagize uwo murwi bakaramuka bemeje intsinzi yiwe, buzoba bubaye ubwa mbere uwutavuga rumwe n’ubutegetsi atsinze amatora ku ncuro ya mbere kuva Senegali yikukira mu 1960.
Ubundi kugira uwo murwi wanke intsinzi y’uwatahukanye amajwi menshi, ni uko haba hagize uwitwara yanka ibiharuro vyatangajwe n’umurwi utunganya amatora. Kuri iyi ncuro, abagiye mu matora bose barimwo umugambwe uri ku butegetsi, barakeje Bassirou Diomaye Faye, bemeza ko ari we yegukanye intsinzi.
Abasesanguzi bavuze ko kubona ata mananiza yabayeho mu vy’ukwemeza intsinzi ya Diomaye, bizotuma uguhererekanya ubutegetsi hagati ya we na Macky Sall vyihuta.
Bassirou Diomaye Faye afise imyaka 44. Niyamara kurahira nka prezida wa gatanu w’ico gihugu, azoba abaye indongozi ya mbere itwaye Senegali ku myaka mike.
Forum