Amerika yoba igiye kuvana abasirikare bayo bari muri Nijeri. Ubushikiranganji bw’intwaro yo hagati muri Nijeri, bwatangaje ano makuru, buvuga ko Amerika, vuba izokwerekana ingene yipfuza ko ibikorwa vyo kuvana abasirikare bayo muri ico gihugu vyogenda.
Biciye mw’itangazo, ubwo bushikiranganji bwavuze ko Kathleen FitzGibbon aserukira Amerika muri Nijeri, yabonanye na Jenerari Mohamed Toumba atwara ubushikiranganji bw’itwaro yo hagati, baraganira kuri iyi ngingo.
Nijeri ivuga ko Madamu FitzGibbon yabwiye Jenerari Toumba ko Amerika yafashe nka nkama ingingo yayo, isaba ko amasezerano yemerera abasirikare ba Amerika kuba ku butaka bwayo asamburwa.
Nijeri iheruka kwiyamiriza amasezerano yasinywe hagati yayo na Amerika mu 2012, ivuga ko ari amasezerano atabayemwo ubwumvikane bw’impande zose. Nijeri ibandanya kuvuga ko umugambi usambura ayo masezerano, uzobwirizwa kwumvikanwako n’impande zose.
Matthew Miller, avugira ubushikiranganji bujejwe imigenderanire y’Amerika n’amakungu yanse kugira ico avuze kw’itangazo rya Nijeri. Yavuze ko “gushika ubu, muri rusangi amasezerano yemerera ingabo za Amerika kuba ku butaka bwa Nijeri akimeze uko yari asanzwe.”
Miller, abandanya kuvuga ko Amerika yavuganye n’abategetsi ba Nijeri ibasaba umuco, gutyo ko kugira ico avuze ku bikiri mu biganiro ataco vyokungura.
Nijeri ivuze ko habaye umubanano na ambasaderi wa Amerika, inyuma y’umunsi umwe Jenerari Abdourahamane Tiani atwara Nijeri vy’imfatakibanza, akoranye ikiganiro kuri terefone na prezida w’Uburusiya Vladimir Poutine. Abo bategetsi bayaze ku kungene bokomeza ugufashanya mu vy’umutekano.
Amerika muri Nijeri ihafise ingabo zirenga 1000, zagiye gufasha kurwanya abakora iterabwoba mu karere ka Sahel. Izo ngabo zifise ikambi ikomeye ahitwa Agadez, mu buraruko bwa Nijeri.
Abasirikare ba Amerika bakava muri Nijeri, bazoba bakurikiye ab’Ubufaransa baheruka kuva muri ico gihugu ku busabe bw’abasirikare bakoze kudeta.
Forum