Hayiti Yateye Intambwe mw'Ishirwaho ry'Inzego Mfatakibanza

Hayiti yateye intambwe mu nzira iganisha kw’ishirwaho ry’inzego mfatakibanza. Umurwi w’abazotwara vy’imfatakibanza Hayiti, akaba ari nawo ujejwe kuzogena umushikiranganji wa mbere, wasohoye itangazo ryawo rya mbere kuva abawugize bagenywe. Ibikorwa vy’abagize uwo murwi vyari bimaze iminsi ataho bija.

Mw’itangazo ryabo, bavuze ko bo n’uwo bazokwizera nk’umushikiranganji wa mbere, biteguriye guhoza abanyagihugu ba Hayiti, bari mu co bise “umubabaro ntangere batewe n’urukurikirane rw’intwaro mbi itigeze ibitaho”. Abawugize bemeye kugarukana vyihutirwa umutekano na demokarasi.

Hayiti imaze igihe mu kajagari n’umudugararo. Ariel Henry yagiye ku butegetsi inyuma y’igandagurwa rya Jovenel Moise yaremeye gutanga imihoho nkuko abagizi ba nabi bateje umudugararo babisaba. Gusa, asigura ko imihoho yiwe izoja mu ngiro ari uko hagenywe uwumusubirira nk’umushikiranganji wa mbere.

Mu kurindira ko inzego mfatakibanza zishingwa, abanyahayiti babandanya kugarizwa n’umutekano muke uterwa n’abagizi ba nabi bagenzura hafi igihugu cose.