Guverinema ya Togo yimye amashyaka atavuga rumwe n’ubutegetsi, uruhushya rwo gukoresha imyigaragambyo muri iki cyumweru, yamagana ivugurura ry’itegeko nshinga ryakuruye umwuka mubi ushingiye kuri politiki.
Cyakora amashyaka muri iki gihugu yavuze ko ntagihindutse, ku minsi ibiri y’imyigaragambyo irwanya ivugurura ry’itegeko nshinga hamwe n’icyemezo cya guverinema cyo gutinza amatora ateganyijwe kw’itariki 20 y’uku kwezi kwa kane.
Abatavuga rumwe n’ubutegetsi bavuga ko iryo vugurura ari ikigeragezo cya Perezida Faure Gnassingbe, uri ku butegetsi guhera mu 2005.
Minisitiri w’ubuyobozi bw’igihugu, Hodabalo Awate, yavuze ko impapuro zisaba uruhushya rwo gutegura imyigaragambyo zitahagereye igihe kandi ko zarenze ku mategeko.
Mw’ibaruwa yaragize ati: “Kubera izo mpamvu, gukoresha imyigaragambyo yari iteganyijwe tariki 11 y’uku kwezi kwa kane, iya 12, n’iya 13 uyu mwaka wa 2024, ntibyemewe”. Ariko, ishyaka ritavuga rumwe n’ubutegetsi, Alliance Nationale pour le Changement (ANC) n’andi matsinda, bavuze ko imyigaragambyo ishobora gukomeza, uretse ko ibikorwa byayo bizagabanuka, kuwa gatanu no kuwa gatandatu.
Igisubizo cy’ayandi mashyaka atavuga rumwe n’ubutegetsi, nticyahise gisobanuka.
Imyigaragambyo mu mihanda yaraciwe muri Togo, kuva mu 2022, nyuma y’igitero mw’isoko ry’i Lome, ubwo umujandarume yicwaga. (AFP)
Forum