Washington DC........
*** Umkhokheli webandla leCCC uMnu Nelson Chamisa uthi iZimbabwe Electoral Commission (ZEC) kumele ilandele umzeliso weleKenya ivumele izizalwane zeZimbabwe ezihlala kwamanye amazwe ukuthi zivote kukhetho oluzayo zikulawomazwe. Kodwa abeZanu PF bathi abavumelani lakho lokhu.
*** Inhlanganiso ebona ngamalungelo abathengi eyeConsumer Council of Zimbabwe ithi imali edingakalayo ukusetshenziswa ngumdeni olabantu abayisithupha ngenyanga isiyehlile ngenxa yokuwa kwentengo yamafutha ephethulo.
*** UMongameli Emmerson Mnangagwa uthi abalemibhobho engekho emthethweni kumele bayihambise emapholiseni njalo abasoze babotshwe kumbe babuzisiswe ngokuthi bazithola njani lezizikhali.
*** Kusigaba sezizalwane zeZimbabwe ezihlala kwamanye amazwe, namuhla sixoxa loMnu. Dan Moyo, odabuka eZimbabwe ohlala eMelika, ngokhetho oliqhutshwa kwele Kenya. Abadabuka kulelolizwe abahlala kwamanye amazwe bavote kukhetho lokudinga umongameli.
*** Unobhala obona ngobudlelwano beMelika lamanye amazwe womhlaba u-U.S. Secretary of State Antony Blinken okuhambo lwamazwe awezwekazi leAfrica, ubikwa ezafika kweleRwanda kusasa.
***KuLivetalk namhlanje, kuhlelo “Diaspora Forum” sikhangela ukhetho lokudinga umongameli weleKenya, lapho abadabuka kulelo lizwe asebehlala kwamanye amazwe abenelise ukuvota kulolukhetho okwakuqala besemazweni abasebenzela khona.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.