Umsekeli kamqeqetshi weqembu lomdlalo wenguqu eleHighlanders uJoel Luphahla uthi ulethemba elokuba abagadli babo bazatshaya eziwayo emdlalweni wabo leCranborne Bullets kusasa ngeSonto.
Ukwehluleka ukulitshayela emambuleni kanye lokuvikela isango labo emidlalweni esanda kwedlula sekudale ukuba iqembu leHighlanders litshelele lizithole selihlezi endaweni yesithathu engalaneni yemiklomelo lona selidumela emansumpeni kusizini yalonyaka.
Umsekeli kamqeqetshi weqembu leBosso uJoel Luphahla uthi kungumlandu wabo njengabaqeqetshi ukuba bakhuphule ukuzethemba kwabadlali babo ngoba sekuyehle kakhulu.
“Abagadli bethu laba akusikho ukuthi abasakwanisi ukudlala ibhola namhlanje kodwa njengomgadli ungahlala isikhathi eside uthola amathuba kodwa ungawahlohli umoya uyayehla ngoba okujabulisa umgadli yikutshaya amambule. Ukuzethemba vele kuyehla nxa umgadli engahlala engatshayi amambule njalo yikho lapho okuqala khona ukubona abadlali sebehozwa ngabalandeli kodwa kungumsebenzi wethu njengabaqeqetshi ukuba sibasekele sibaphe ithemba elokuba konke kuzalunga,” kutsho uLuphahla.
Umdlali osakhulayo uGillian Nyathi, yena oke waphiwa ithuba lokudlala ensukwini ezedluleyo, uthi labo njengabadlali bazabopha ziqine ukuze iqembu linqobe.
“Mina engingakutsho yikuba ithuba engaliphiwa ngabaqeqetshi ngalithatha ngalisebenzisa njalo ngakholisa lendlela abalandeli abangemukela ngayo. Sizaqhubeka sisiya phambili loba kunzima njalo sizakhuphula umfutho,” kutsho uNyathi.
Imidlalo yesigaba seCastle Lager Premier Soccer League edlalwe namhla iphele kanje; Herentals ibhaxabule iYadah nge 4 ka nya ngaseNational Sports Stadium, iqembu elihlezi phezu kwengalane eleNgezi Platinum Stars litshaye eleChicken Inn 1 nya ngaseBaobab, iBulawayo Chiefs inqotshwe 1 ka nya yiSimba Bhora ngaseLuveve, iZPC Kariba itshaye iFC Platinum 2 ka 1 ngaseNyamhunga, kuthi iBlack Rhinos leGreen Fuel zibe ngutshiki lobhanqa 0 ka 0 ngaseBata.
Kusasa ngeSonto iqembu leTriangle lizadibana leleHwange ngaseGibbo kuthi eleCaps United lizangqikilana leleSheasham ngaseNational Sports Stadium.
Kusasa njalo iqembu labesifazane elimela ilizwe emdlalweni wenguqu lizadlala leleMozambique kudingwa iqembu elizaphutsha lisendaweni yesithathu kumncintiswano weCosafa Women’s Cup oqhutshelwa elizweni leSouth Africa.
Iqembu leZimbabwe linqotshwe nge 1 ka nya ngeleZambia ngoLwesihlanu kusigaba se semi – final kuthi eleMozambique lona litshaywe nge 2 ka 1 ngeleMalawi okutsho ukuba eleZambia leleMalawi yiwo azadibana kufinal kusasa ngeSonto.
Forum