Yehlukene imibono yabalandeli bomdlalo wenguqu phezu kokuba yiliphi iqembu sibi sibili elizaphakamisa inkezo yeAfrica Cup of Nations phakathi kweIvory Coast leNigeria ngeSonto kulandela ukungena kwamaqembu la ku-final yalumncintiswano izolo.
Iqembu leIvory Coast lizadibana leleNigeria ngeSonto emdlalweni okhangelelwe ngabanengi kudingwa intshantshu zezwekazi leAfrica emdlalweni kanobhutshuzwayo.
Lawa maqembu afinyelele kulesisigaba ngemva kokuba eleNigeria linqobe eleSouth Africa nge 4 ka 2 ngemva kokutshaywa kwembekwa kuthi eleIvory Coast lona litshaye eleDemocratic Republic of Congo nge 1 ka nya.
UAntony Nakamba, uyise kaMarvelous ongukaputeni weqembu lamaWarriors njalo edlalela iqembu leLuton Town FC engilandi, uthi iqembu leIvory Coast lisesimeni esihle sokuphakamisa inkezo yeAfcon.
“Iqembu leIvory Coast ngibona mina seliyithatha inkezo ngoba lapho esifike khona ifike ngenhlanhla. Phezu kokuba lenhlanhla badlala phambi kwabalandeli babo. Yebo kambe bengabe bedlala leqembu leNigeria okuliqembu elikhulu elidlala kuhle, khonokho ukuthi laba badlala besekhaya kuzakwenza beyiphakamise inkezo,” kutsho uNakamba.
Intathelizindaba yezemidlalo uSukoluhle Mthethwa yena uthi ukudlala phambi kwabalandeli balo sekungaliphazamisa iqembu leIvory Coast.
“Iqembu leIvory Coast liyabe lidlala liphambi kwabalalandeli balo okutsho bazabe belomthwalo onzima ngoba bazabe bengafuni ukudanisa abalandeli babo elizweni labo. Lokhu kungenza bengadlali ngendlela abafisa ukudlala ngayo, okuyinto engahle isetshenziswe liqembu leNigeria ukuthi liyiphakamise inkezo,” kutsho uMthethwa.
Owadlalela iqembu labesifazane elimela isizwe emdlalweni wenguqu njalo osengumqeqetshi wabaqeqetshi uSithethelelwe “Kwinji” Sibanda, uthi kuzakuba ncane indawo ngeSonto.
“Ngibona umdlalo okuzasetshenziswa amandla kakhulu ngoba emidlalweni eyedluleyo amaqembu womabili abesebenzisa amandla ukunqoba amanye amaqembu. Iqembu leIvory Coast lona lizancediswa kakhulu ngabalandeli balo kodwa badlala ibhola elifanayo leNigeria ngoba badlala bebambene njalo belamadlabuzane,” kutsho uSibanda.
Phambilini kwemidlalo yama-semi-finals umlandeli wenguqu uNhlanhla “Mtshinda” Moyo uhle wathi ku final kuyangena iqembu leIvory Coast leNigeria wona ayekusibaya sikaGroup A ekuqaleni komncintiswano.
Kumidlalo yezibaya iqembu leNigeria linqobe eleIvory Coast nge 1 ka nya kodwa uMtshinda uthi ziyojika izinto kufinal.
“NgeSonto zizabe zithelekene iIvory Coast leNigeria njalo kuzakuba nzima ngoba eleIvory Coast liyathanda ukusebenzisa amandla ikanti abeNigeria bona bathanda ukuhlasela kakhulu. Ngakwelinye icele iqembu leIvory Coast likhangelele kuSebastien Heller kuthi eleNigeria lithembele kuVictor Osihmen kodwa ngiyakwazi ukuthi iIvory Coast khathesi izalisebenzisa ithuba. Yebo kambe kuqala ladliwa kodwa lahlohlwa ngombekwa njalo khathesi yilo elizaphakamisa inkezo,” kutsho uMoyo.
Amaqembu anqotshwe esigabeni sama-semi-finals athi eleSouth Africa leleDRC wona azadibana ngoMgqibelo kudingwa iqembu elizaphutsha lisendaweni yesithathu.
Umlandeli wenguqu waseZimbabwe uNkosilomusa Sibanda uthi eleSouth Africa yilo elizathatha imendulo eyeBronze.
“Ngibona angani iqembu leSouth Africa lizanqoba ngoba liyake vele lilinqobe iqembu leDRC. Ungakhangela futhi langendlela abadlala ngayo abeSouth Africa balokuzwisisana okukhulu okusukela kubadlali babo abadlala emuva njalo phezu kwalokho bavele labo bayabe befuna ukuphutsha besendaweni yesithathu,” kutsho uSibanda.
Iqembu leIvory Coast like layiphakamisa inkezo yeAFCON ngomnyaka ka1992 langomnyaka ka2015 kuthi eleNigeria liyiphakamise ngo1980, 1994 lango2013.
Forum