Iqembu leSouth Africa lizadibana leleDemocratic Republic of Congo namhla ebusuku kudingwa iqembu elizaphutsha lihlezi endaweni yesithathu kumncintiswano weAfrica Cup of Nations wona ofika emaphethelweni kusasa. Umcnintiswano owenkezo eye Afcon lonyaka uqhutshelwa kwele Ivory Coast.
Olandela iligi yeSouth Africa uThabo Ncube uthi iqembu leBafana Bafana linganqoba nxa abagadli balo bengasebenzisa amathuba abawatholayo.
“Ngicabanga ukuba iSouth Africa ingaphutsha isendaweni yesithathu ngoba emdlalweni wabo owedluleyo bake bazama ukuba bahlohle njalo bathole amathuba amanengi okokuthi kulumdlalo nxa bengalungisisa behlohle benganqoba,” kutsho uNcube.
Obedlalela iqembu leToronto kusigaba seBulawayo Province Division 2 nyakenye uRay Ndlovu uthi imbekwa yiyo ezahlukanisa iSouth Africa leDRC.
“Lumdlalo uzaphela zingutshiki lobhanqa zize ziyetshaya imbekwa ngoba womabili lawa maqembu aqinile emuva njalo ungakhangela abadlali beqembu leSouth Africa abadlala enkabeni yenkundla bayavikela imvimbi zabo. Yikho okuzakwenza bengahlohlwa kakhulu yikho ngisithi kuzaze kungezelelwe isikhathi kulokhu kungela esinqobile,” kutsho uNdlovu.
Imvimbi yeSouth Africa uGrant Kekana akasoze adlale namhlanje ngoba watshengiswa ikhasi elibomvu emdlalweni wabo leNigeria njalo umdlali weqembu leEast Rovers uMpilwenhle Ndlovu uthi lokhu sekungalisebenzela iqembu leDemocratic Republic of Congo.
“Iqembu leDemocratic Republic of Congo lizanqoba nge 1 ka nya okutsho yilo elizaphutsha lisendaweni yesithathu ngoba iqembu leSouth Africa imvimbi zalo azidlali kuhle,” kutsho uNdlovu.
Odlalela iqembu leBulawayo City uNtandoyenkosi Dube laye uthi iqembu leDemocratic Republic of Congo lizaphutsha lisendaweni yesithathu.
“Iqembu elingaphutsha lisendaweni yesithathu ngeleDemocratic Republic of Congo kuthi eleSouth Africa liqede lisendaweni yesine.
Ungakhangela indlela iqembu leSouth Africa elidlala ngayo alihlaseli kangako ikanti eleDRC lona lithanda ukudlala lisiyaphambili njalo belikufuna kakhulu ukuphakamisa inkezo okokuthi selizadanela ekuqedeni lisendaweni yesithathu,” kutsho uDube.
Umdlali oke wadlala kweleBotswana uThabiso Ndlela uthi iqembu leSouth Africa kumele linqobe ngoba limele wonke amazwe aseningizimu yezwekazi laseAfrica.
“ISouth Africa ngibona inganqoba ngoba kumele isimele lathi njengoba siyilandela lathi njengabomakhelwane okokuthi singathokoza kakhulu nxa ingaqeda isendaweni yesithathu,” kutsho uNdlela.
Amaqembu asemhlubulweni wangezansi yezwekazi le Africa athi eleSouth Africa leleDemocratic Republic of Congo adibana ngehola letshumi namhla ebusuku ikanti umdlalo wokucina kulumncintiswano uzakuba phakathi kweIvory Coast leNigeria kusasa ebusuku ngehola letshumi. Iqembu ele Nigeria likhangelele ukuthola inkezo eye Afrcon okwesine kuthi ele Ivory Coast lona likhangelele ukuthola linkezo okwesithathu nxa linganqoba.
Forum