Umculi kaMaskandi uAnthony Tshuma oweNkayi owazakala ngokuthi nguNyon’emnyama Mlandi Wetshitshi uthi uselolonga idlalade lakhe lesihlanu azalethula mhlaka 13 ngenyanga kaMabasa e Moon Knight Bar eDoornfontein eSouth Africa lapho agxile khona.
UNyon’emnyama uthi kuyadanisa ukuthi abasoze bexhaswe ngumuyi uMbuso Gali Ncube obesebenza labo njalo owayetshayela iNdolwane Super Sounds iziginci, ongcwatshwe ekuqaleni kwayonale inyanga kaNhlolanja.
Wengeze wathi ingoma ezikuleli idlalade, zigoqela eyinye lapho ahlabela ngomuyi obengumculi u Elvis “Ma Eli” Mathe obhubhe engozini yongwaqo ekupheleni komnyaka odluleyo lezinye ezinengi-nengi.
UNyon’emnyama, osebenza labaculi abehlukenyo, uthi ucela ama sponsors abaphathise ukuthuthukisa umculo wabo, labantu bethenge ingoma zabo njalo bebanxuse emcimbini ukuthi bezohlabela.
Ukhangelele ukuxhaswa ngababalisa Abafana BakaMlotshwa, Getty Diamond, Boss Golide, Mkhuthazi Wabenzakahle, Makhonza Super Sounds, Mvumeni, Kiss Before, Dladla Mzukulu weShona kuthi uDJ Mapressa lo Thando Tshuma beqhube lumcimbi.
Uqhubeke wathi uzakwethula idlalade lakhe ngemva kokuphatheka emcimbini ka Chief Dakamela eNkayi, owokunikeza abasebenzele intuthuko yeMatabeleland izicoco.
Abaculi, imbongi, labanye abalingiswa bakhangelelwe ukuthokozisa abantu ngoLwesihlanu koDakamela mhla ziku five kuMabasa phambilini kwalumcimbi ngoMgqibelo mhlaka six.
Unyon’emnyama sowethula umculo othi Emlandweni KaDakamela lapho ancoma imisebenzi yenduna egoqela inhlelo zokwakhela asebeluphele izindlu, isikhwama sokubhadalela abantwana ezikolo, isiphala senkosi, isibaya senkosi, lezinye inhlelo zokuthuthukisa isabelo sakhe.
Ngomnyaka odluleyo, kwakuthe gwaqa kulumcimbi koDakamela “inkosi yamaNdebele” uBulelani kaLobhengula Khumalo, induna zeMatabeleland leMidlands, iziphathamandla zikahulumende, abalwela ilungelo loluntu, abalingisi, labantu makhaza
Forum