Ukulwisana kuyaqhubeka phakathi kwamacele ebandla leCitizens Coalition for Change lapho ozithi ngunobhala jikelele walelibandla athi kasoze axotshwe ku CCC ngakade esebenza labo abagoqela ilunga lalelibandla uMnu. Albert Mhlanga ngoba bengelalungelo lokwenza lokho njalo bengaqhubeka besebenzisa uphawu lwalelibandla bazakuba senkingeni ngoba eselubhalisile.
Kodwa uMnu. Mhlanga utshele iStudio 7 ukuthi abalandaba lophawu lolu njalo bazasebenzisa awabo amagqwetha ukulwisa inyathelo likaMnu. Tshabangu, lanxa ethembe iziphathamandla zalelibandla ezingabammeli ezigoqela uMnu. Welshman Ncube lazo ezingalukhutha ugatsha.
UMnu. Mhlanga uthi bamise uMnu. Tshabangu umsebenzi okwesikhatshana ebandleni le CCC ngoba kusobala ukuthi usesebenza lecele elikhokhelwa nguMnu. Ncube okwamanje, njalo wabakhupha kuluhlu lwamabizo alabo okwakufanele babengamalunga edale lephalamende wafaka azikhethele bona.
Lokhu kulandela ukuxotshiswa kwamalunga eCCC ezikhundleni zawo; ayesekela uMnu. Chamisa osowatshiya lelibandla.
Ukuhlaziya loludaba, sixoxe lengcwethi ecubungula ezombusazwe uMnu. Mqondobanzi Magonya, osekela ibandla leZAPU yena othi abantu beMatabeleland leMidlands kufanele betshiyane lamabandla abunjwa eHarare, bexhasane leleZAPU, okuyilo elidala kulezi izigaba.
Forum