Usomabhizimusi odabuka kweleMelika, uNkosazana Tsega Tadesse, owethekelela ele Zimbabwe, ukhuthaza osomabhizimusi abazimeleyo bakoBulawayo ukuba basebenze ngamandla bengayekethisi ngoba ukusungula ibhizimusi uzimele kudinga isibindi.
Ekhuluma emkhosini wabosomabhisimusi owenzelwe enkundleni eye Barbourfields Stadium koBulawayo, oweHustlers Summit, Ngolwesihlanu, ingcwethi kwezamabhizimusi odabuka eMelika, uNkosazana Tadesse ukhuthaze osomabhizimusi ukuba babe lenhloso yokukhulisa amabhizimusi abo ngoba kungelula ukuba lawo."Akulula ukusungula ibhizimusi lize likhule kodwa okumqoka yikuba lamasu adlula amathathu okuqinisa ivhizimusi lakho ngesikhathi ubhekane lobunzima ngoba buvele buhlala bukhona."
Usomabhizimusi osakhulayo ongene iHustlers Summit odabuka kwele South Africa, uNkosazana Nicollete Mashile, ongumqondisi wenkampani ethiwa Financial Fitness Buddies uvumelane loTadesse.
"Unganazelele ibhizimusi ifuna umuntu ohlelekileyo ngoba akula leyodwa inkampani engahlangani lobunzima ngakhoke ngesikhathi ulobunzima kumele usebenze gadalala ukuqinisa ibhizimusi lakho ukuze lingadiliki njalo imali kumele uyiphathe kuhle ukwenzela ukuthi ngesikhathi sekunzima uyacupha esiphaleni ibhizimusi liqhubeke hatshi ukuthi lihle litshabalale."
UNkosikazi Thubelihle Ndlovu, umqondisi wenkampani ethiwa Portify Investments eboleka imali lokuhlomisa osomabhizimusi ngolwazi, uthi ngempela akulula ukusungula lokuthuthukisa ibhizimusi.
"Ngiyafundisa osomabhizimusi kanye lokubahlomisa ngezifundo zokuqhuba amabhizimusi kodwa izavunguzane aziswelakali okudinga ukuthi usomabhizimusi abelenjongo eqinileyo lokumelana lobunzima ungadangali."
USomabhizimusi owafunda kweleMelika ukuphatha ibhizimusi engumqondisi wenkampani ethiwa Eden Fresco, uNkosikazi Thembelihle Nyathi, uthi ulima indumba zesilungu lepepper.
"Ngiyajabula ukuba uhulumende weMelika emanyene lowakuthi useqalile ukuhlomisa abafundi ngezokusungula lokuba lamabhizimusi ngoba beyibo njalo osomabhizimusi bethu bakusasa."
Osakhulayo ofunda eMganwini High School, uAisha Mpofu ongene iHustlers Summit, uthi bafunde ngokuthi amabhizimusi asungulwa njani.
"Sifunde okunengi lapha kodwa okumqoka kwakhona sifunde ngokusungula lokuphatha amabhizimusi ethu ngendlela ephakeme."
EleZimbabwe lihamba phambili kulezinsuku ngokukhuthaza uzulu ukuba asungule amabhizimusi ngoba kuyiwo asephethe intuthuko yomnotho welizwe kulandela ukuvala kwamabhizimusi amakhulu, amankampani lamafekitali ayeqhatsha inengi.
Forum