Izizalwane zakweleBotswana zikhala ngokugcwala kwabasebenza umsebenzi wabonogada kunye labalondoloza ukuthula emcimbini, ama bouncer ngesilungu, abavela phandle kwelizwe ikakhulu eZimbabwe leSouth Africa besithi basebenza ngokungekho emthethweni, okulakho ukubeka imvikela yelizwe engozini.
Umgcinisihlalo wenhlanganiso ebona ngabonogada eye Security Association of Botswana, uMnu. Samuel Kealotswe uthi akufanelanga kuqhatshwe abenza limisebenzi abavela phandle kwelizwe.
Wengeze wathi sebenanzelele ukuthi amankampani amanengi aqhatsha abokuza ukulinda izakhiwo kumbe ukuma emagedini ngezikhathi zemicimbi.
“Akuvunyelwa ngoba imisebenzi le ngeyezizalwane hatshi abantu bokuza.Silabantu abeneleyo abangenza lumsebenzi ngakho asingeke savumela ukuthi kulethwe abantu phandle.”
UMnu. Kealotswe uthi ukuqhatsha abantu bokuza kuhlangothi lwezomvikela kungafaka ilizwe engozini.
“Kumele uyenelise ukuthi uthathe isithupha njalo wazi ukuthi uvela ngaphi njalo kumele abe lencwadi zalapha. Umuntu ongalakho lokhu uyingozi.”
Kodwa oweZimbabwe okumdlalo wokwakha umzimba ngokuphakamisa insimbi, owe bodybuilding, uMnu. Lust Sithole kavumelani lo Mnu. Kealotswe ikakhulu kudaba lokuqhatshwa kwabalinda emicimbini.
“Angitholi ukuthi kungani esithi akumelanga besebenze njengama bouncers. Lo ngumsebenzi ophiwa umuntu obumbekileyo, oleziqwanga. Imthetho yakhona iyatshiyana kusiya ngomuntu obambe umcimbi.”
Inhlanganiso ye Security Association of Botswana ithi bonke okumele besebenze noma yiwuphi umsebenzi wokulinda izakhiwo kumbe imicimbi, kumele babhalise kunhlanganiso eyabunjwa nguhulumende.
Inhlanganiso ye Private Security Services Licensing Authority yiyo enika umuntu imvumo yokuthi asebenze njengo mlindi wesakhiwo kumbe abenguye obona ngokuthula emcimbini.
Owe Zimbabwe ohlala kwele Botswana uMnu. Mkhululi Moyo uthi abeBotswana yibo abakhetha abeZimbabwe ukuthi babe ngabalindi bezakhiwo kumbe emcimbini.
“Bayabe bekhangele ukuthi umuntu wakhiwe njani emzimbeni, njalo uthola ukuthi abanye abeBotswana bakhangelela phansi eminye imsebenzi efana lokulinda izakhiwo.”
Ukukhonona kuka Mnu. Kealotswe kuveze ukuthi kulabanye ababeku butho emazweni abo, ngakho uhulumende angeke avumele ukuthi kuqhatshwe abantu abangafaka umvikela welizwe engozini.
Ngeviki edluleyo umongameli Mokgweetsi Masisi wakweleBotswana ubesidla amalahle ngemva kokuba amalunga edale lephalamende yelizwe lakhe esole imizamo yokuthi abe Zimbabwe bangene kweleBotswana besebenzisa izithupha hatshi ingwalo zama phasiphothi.
AbeZimbabwe bathi bafuqwa yisimo esingamanga kuhle esomnotho ekhaya ukuthatha noma yiwuphi umsebenzi ongabaphilisa kwamanye amazwe.
Forum