Abagada amabhasi lemitshova eHarare bakhangelane lodubo lokuswelakala kwentshintshi njengoba abathwala uzulu bengasemukeli imali yelizwe eyayisetshenziswa njengentshintshi nxa umuntu ebhadala ulutho oluphansi kwedola leMelika kulandela ukwaziswa kwemali entsha.
Udubo lolu lubhahile njengoba abantu abanengi bebegada imitshova nge50 cents yeMelika.
Ibhanga elikhulu lesizwe eleReserve Bank of Zimbabwe lazisa ukuthi imali entsha eyohlobo lweZimbabwe Gold (ZiG) izaqala ukutholakala ekupheleni kwayonale inyanga.
Eminye imitshova isiqale ukupha abantu iziwiji lamakuponi njenge ntshintshi. Kulabantu abanengi abakhonona ngokuthi baphiwa impahla abangayidingiyo njalo bengenelisi ukuyisebenzisa ukugada imitshova.
Abanye sebecina behamba bebabili ukwenzela ukuthi bengalahlekelwa yimali bahle babhadale bebabili kudola.
Abathwala abantu abaya elokitshini leKuwadzana abasuka edolobheni sebelamakuponi abawapha uzulu njengentshintshi. Anakuponi la umuntu uyenelisa ukuwasebenzisa ukugada imitshova eya eKuwadzana kuphela.
Umqondisi wenhlanganiso elwela amalungelo ezakhamizi zeHarare eyeHarare Residents Trust, uMnu Albert Mazula, utshele uthi abagada amakhombi yibo abalahlekelwayo.
Forum