Ingcwethi kwezomnotho, abaphikisayo labanye bathi seliphelelwe ngumphako idollar leZimbabwe eseligugudeke okokuthi kalisathengi lutho.
Okwamanje idollar leMelika elilodwa lithenga amadollar eZimbabwe afika phose inkulungwane ezingamatshumi amabili – ZW$21,390 emkambo wesizwe kuthi emkambo wensitha lithengwa ngamadollar eZimbabwe azinkulungwane ezingamatshumi amathathu lantathu – 33,000.
Bathi kuqakathekile ukuba ilizwe libe lemithetho eqinileyo eyokuthenga lokuthengisa idollar leZimbabwe njalo levimba ubukhohlakalo obumemetheka ngamandla njalo obunye obukhanya busenziwa yiziphathamandla zikahulumende labadlelana labo.
Bathi kuqakathekile njalo ukulandela okwethulwa yinhlanganiso yeInternational Monetary Fund leWorld Bank abathi akumelanga kwekelelwe ubukhohlakalo obubhidliza umnotho welizwe. Umgcinincebo kahulumende, uMnu. Mthuli Ncube, uthi lizahlala lisetshenziswa elizweni idollar leZimbabwe loba ligugudeka ngamandla. Abanye bathi akulunganga ukulilahla kube sokusetshenziswa idollar leMelika kube lezinye ingcwethi kwezomnotho ezithi selingumqoba ongathengi lutho ngakho kumele lilahle.
Ukuze sihlaziye udaba lolu iStudio 7 uxoxe leyinye yengcwethi kwezomnotho uMnu. Rejoice Ngwenya, okunhlanganiso yeCommon Market for Liberal Solutions othi uNcube layanye bakhe kumele befunde kokwenzakala kwele Zambia lamanye amazwe okwaso.
Forum