Ingcitshi zithi uhulumende kumele alungisise udubo lwamagetshi ukuze kwengezelelwe isivuno sengqoloyi ezalinywa ngesikhathi somqando.
Uhulumende ngoLwesibili wazise intengo zengqoloyi, umumbu lamabele ezintsha ngenhloso yokukhuthaza abalimi ukuthi balime ingqoloyi enengi ngesikhathi somqando.
Ingqoloyi isizathengwa ngamadola eMelika angamakhulu amane lamatshumi amane US$440 kuthani linye ngalinye njalo umumbu lamabele kuzathengwa ngamadola eMelika angamakhulu amathathu lamatshumi ayisithupha US$360 kuthani linye ngalinye.
Ekhuluma lentathelizindaba ngemva komhlangano wabaphathintambo bakahulumende umphathintambo wogatsha lwezemibiko uMnu Jenfan Muswere uthe bengezelele intengo lezi ngenhloso yokukhuthaza abalimi ukuthi balime ingqoloyi njalo kwenqatshelwe ukuswelakala kokudla elizweni kulandela ukungani kuhle kwezulu.
Lokhu kuza ngalesi isikhathi ilizwe libhekane lodubo lwamagetsi, wona adingakalayo kakhulu ekuthelezeleni ingqoloyi.
Ingcwethi yezokulima njalo efundisa ekolitshini leNational University of Science and Technology (NUST) Umnu Everson Ndlovu utshele uTaboka Ncube Studio7 ukuthi isivuno sengqoloyi silakho ukwengezelelwa njengoba kukhangelelwe ukuthi kuzakuba kungatshisi ngesikhathi ingqoloyi ilinywa njalo. Welekelele esithi okudingakalayo yikuthi abalimi lohulumende bathole ezinye indlela zokuthelezela nxa kungela magetsi.
Forum