Uhulumende wazise ngoLwesibili ukuba uzagebha izibholane ezingamatshumi amabili lane (24) eBuhera phansi kwamalungiselelo omkhosi walonyaka owokuthakazelela usuku lukazibuse olwe-Independence Day.
Ekhuluma lentathelizindaba ngemva kokungena umhlangano wabaphathintambo bakahulumende, umphathintambo wogatsha lwezemibiko uMnu. Jenfan Muswere wazise njalo ukuba uhulumende uzalungisa imigwaqo eqonda eBuhera phansi kwamalungiselelo la.
Imigwaqo le igoqela oxhumanisa iMurambinda leBirchenough Bridge, Chivhu-Nyazura, Wedza-Mutiweshiri lowe Murambinda-Marenga.
Umkhosi lo uzaqhutshelwa eBuhera ngenyanga ezayo njengoba sekuyimvama ukutshintsha indawo eziqhutshelwa lumkhosi minyaka yonke.
Ingcwethi sezisole lelinyathelo zisithi umkhosi lo uzafaka impalakahle kazulu engozini njengoba iBuhera ikhangelane lodubo lomkhuhlane weCholera.
Iphephandaba leDaily News libika ukuba lumkhuhlane ubalale abantu abangamatshumi amathathu kuyonaliviki.
Olandela ezombusazwe njalo engunobhala jikelele weFreedom Alliance, uMnu Nhlanhla Moses Ncube, utshele iStudio7 ukuba uhulumende kumele aqakathekise impilakahle kazulu.
Forum