Kulez’insuku sokusetshenziswa indlela ezobungcitshi obuphezulu ezokuqhuba imisebenzi etshiyeneyo eyayisenziwa ngabantu, okuthiwa yiArtificial Intelligence ngeSilungu.
Impumela yalokhu inceda uzulu. Kodwa kulabatsha abathi kayilunganga i-Artificial Intelligence (AI).
Banengi abasakhulayo, ikakhulu abasemadolobheni abasebenzisa i-A-I ekuqhubeni imisebenzi yabo nsukuzonke eZimbabwe lakwamanye amazwe. Imisebenzi yonke lapho okusetshenziswa khona i-A-I yayiqhutshwa ngabantu. Ofundisa eLupane State University, uDokotela Mbulisi Ndlovu, uchasisa ukuba kuyini iArtificial Intelligence.
"IArtificial Intelligence yikulungisa imitshina elama-computer ukuze iyenze imisebenzi eyenziwa ngabantu, sokukhanya engani imitshina leyi ilengqondo kumbe iyacabanga njengabantu. Nxa sisebenzisa imitshina sikwenzela ukuthi izinto ezinengi zibe lula, ukwenzela ukuthi singaginqi njengabantu ekwenzeni izinto."
Ukusetshenziswa kwemitshina yakulez’insuku ngendlela le sokuvamile, ikakhulu emazweni athuthukileyo njalo kunceda kwezempilakahle, ukuvimba ubusela, ukulondoloza amazwe, kwezomnotho kanye lakwezomumo womkhathi. Banengi abathakazelela i-Artificial Intelligence. Omunye wabo ngosakhulayo uZeluleko Zet Moyo ohlala koBulawayo.
"Iyancedisa ukuthi umuntu athole imfundo ehambela lokuthi ungumuntu onjani. Nxa wena ungusomabhizimusi, iyakusiza ekuthini ungamemethekisa okucacileyo, njani lokhu okuthengisayo. Sikhangela kwezempilakahle, umuntu omutsha sesenelisa ukuthola usizo ngokuphangisa encedwa yiyo iA.I, ngoba ikhona imitshina exoxisana laye, imsiza ngalokhu eyabe ekufuna."
Kodwa kulabanye abatsha abangathakazeleli iArtificial Intelligence. UNolwazi Ncube ohlala koBulawayo uthi uyizondela ukuba yenza ukuba abanye abantu beswele imisebenzi.
"Endabeni zokufunda, abafundi sebelobuvila ngoba babhalelwa imisebenzi yesikolo yonke bona bezihlalele. Kutsho ukuthi loba besiyaphutsha izifundo zabo, emakhanda kungaba kungelalutho, okwenza ukuthi isimo semfundiso yethu njengelizwe, ibe phansi. Kuthi njalo, iArtificial Intelligence leyi isithathela abantu imisebenzi yabo ngoba sokusebenza imitshina yakulezinsuku ukwenza lokho okwakusenziwa ngabantu. Yikho ngisithi yikuthuthuka kodwa kuyasiphazamisa empilweni zethu lokhu."
Omunye njalo osakhulayo osebenza kunhlanganiso eyeWomen's Institute for Leadership Development, uLydia Banda, uthi yebo izinto seziguquka emhlabeni wonke jikelele, kodwa kumele eleZimbabwe limise kancane ukusetshenziswa kwe-Artificial Intelligence.
"Ngokubona kwami, yebo inhle indaba yeA.I kodwa isebenza emazweni alomnotho othuthukileyo. Okwakhathesi, njengelizwe silokunengi okumele siqale sikulungise ukuze sihambelane labanye kule indaba- okufana lokulungisa imitshina lokunye okufunakalayo ekusebenziseni iA.I. Imali iyafunakala njalo eyokuthenga izinto ezifana leData elokusebenzisa amagagasi eInternet. Sisasemuva ngakho ngibona ingathi ingxenye eminyakeni elitshumi kusiya phambili, yikho lapho esingathi khona sesiyifuna leyi Artificial Intelligence."
Okunye njalo yikuthi abasakhulayo abasemaphandleni, abatshiywa phandle kwenhlelo ezinengi kabazi lutho ngeA-I. Ezigabeni ezinengi emaphandleni akulamlilo kagesi, amacomputers, ubulembu beInternet lokunye okufunakala ukuze abantu basebenzise iArtificial Intelligence.
Kusenjalo, umphathintambo obona ngezemitshina yakulez’insuku, uNkosikazi Tatenda Mavetera, uthi uhulumende uphakathi kokulungisa umthetho ozaphawula ukusetshenziswa kwe-Artificial Intelligence.
"Njengohulumende sibona ingathi ukusetshenziswa kwemitshina ngaleyi indlela kuhle, njalo siyakusekela. Osokusele yikuthi kubekwe imithetho ezanceda uzulu ukuze asebenzise leyi A.I ngendlela eqondileyo. Lokhu yikho esesikwenza."
UNdlovu ofundisa eLupane State University uthi akumelanga abatsha betshaphazwe yimitshina yakulez’insuku.
"Ngenxa yokuswelakala kwenhlanhla, zivele zikhona izigangi ebantwini, ikakhulu bonaba abatsha abasesiba ngamavila ngenxa yeA.I leyi. Sebethatha imisebenzi yabanye yesikolo besebenzisa ubungcitshi beArtificial Intelligence. Abanye njalo sebedala amacala wokutshontsha besebenzisa iA.I. Kuthi njalo, ikhona okuthiwa yiPhotoshop lapho isithombe somuntu singatshintshwa okuzwayo, ekhanye ingathi engaba kade esendaweni akade engekho khona. Abasakhulayo kumele bengahugeki ukwenza lokhu."
Abatsha bakhuthazwa zingcwethi zebulenjini lezentuthuko ukuba beqhube imisebenzi ezakhuphula izinga labo lokusebenzisa iArtificial Intelligence ukuze benelise ukusebenza labanye babo emhlabeni wonke jikelele.
Forum