UMongameli Emmerson Mnangagwa usekhethe uMnu. Michael Reza ukuba ngumgcinisihlalo wekomishini ebona ngokulwisana lenkohlakalo eyeZimbabwe Anti-Corruption Commission (ZACC).
Umabhalane omkhulu ophethe iwofisi kaMnangagwa, uMnu. Martin Rushwaya, wethule umbiko lo esithi uReza ukhethwe ukuba athathe isikhundla esazibanjwe nguNkosikazi Loice Matanda Moyo, owakhethwa nyakenye ukuba akhokhele uhlangothi lukahulumende olweAttorney General’s Office.
Okwamanje uReza ubengomunye wabakuhlangothi luka hulumende olweNational Prosecuting Office. Wazakala kakhulu ngokubophisa abantu abanengi abagoqela uMnu. Job Sikhala, owahlala phose iminyaka emibili eChikurubi Maximum Security Prison emelele ukuthoniswa icala lokutshotshozela udlakela lokunye, uTendai Biti, uNkosazana Joanna Mamombe, intathelizindaba uHopewell Chin’ono, uMfundisi Evan Mawarire, uNkosazana Fadzai Mahere, uSiphosami Malunga labanye abacatshangelwa ukuba bafuna ukuguqula uhulumende kaMnangagwa.
Ekhetha uReza, uMnangagwa uthe uzakwenelisa ukuvimba inkohlakalo ememetheka ngamandla eZimbabwe elevezwa nyakenye yinhlanganiso yeTransparent International njengamanye amazwe alobukhohlakalo obesabekayo. UMnangagwa uthi uReza wawufundela kakhulu umsebenzi lo.
Kodwa abaphikisayo bathi uMnangagwa wenze okungekho emthethweni ngoba uReza kazilutho ngezokuphatha indaba zobukhohlakalo.
Abakubandla leZanu PF bathi kuqondile okwenziwe nguMnangagwa loba isikhundla lesi singabikwanga kumaphephandaba njalo singesomuntu oseleminyaka emine engumahluli edale leHigh Court.
Ophethe isikhundla lesi kumele njalo abeligqwetha eselisebenze iminyaka eyisikhombisa.
Ukuze sizwe okunengi ngodaba lolu, sixoxe loMnu. Prince Dubeko Sibanda, owayemele iBinga North edale lephalamende ekubandla leCCC, loMnu. Malaki Nkomo owake wamela isigaba seInsiza South edale lephalamende ekubandla leZanu PF.
USibanda uthi akulalutho oluzaguqulwa nguReza ngoba abakhethwa nguMnangagwa ngabantu abangaqedakaliyo njalo abangelandaba lobukhohlakalo lokunye okwenziwa yiziphathamandla zikahulumende labanye abantu kwele Zimbabwe.
UNkomo uthi kunengi okuzaguqulwa nguReza ngoba wafundela ukuphatha indaba ezihambelana lobukhohlakalo, ukusebenzisa imali okungakho emthethweni lokunye.
Sehlulekile ukuxhuma uReza lezinye iziphathamandla zikahulumende ebezingaphenduli omakhalekhukhwini.
Forum