اینټني بلینکن: امریکا د یرغل په هیڅ قسم عملیاتو کې لاس نه دی لرلی
د متحده ایالاتو د بهرنیو چارو وزیر انتوني بلینکن په ایران باندې د اسرایل د هوايي برید د رپوټونو په اړه ویلي چې په دې اړه کره معلومات نه شته.
بلینکن د G7 د بهرنیو چارو د وزیرانو په غونډه کې له ګډون وروسته خبري غونډې ته وویل:
"زه د پېښو د راپورونو په اړه خبرې نه کوم... زه یواځې دومره ویلای شم چې زموږ او د G7 د ټولو غړو هڅه او تمرکز د تاوتریخوالي پر کمولو باندې دی."
بلینکن وویل امریکا د یرغل په هیڅ قسم بریدونو کې لاس نه لري، وایي د امریکې او د G-7 هیوادونو توجه د ممکنه شخړې مخه نیول دي او د هر قسم تاوتریخوالي کمول دي:
"تاسو ولیدل چې اسرایل باندې بریدونه وشول، او بې شکه مونږ دا یقیني کوو چې اسرایل په موثره توګه خپله دفاع وکړي خو ورسره دې د شخړې له زیاتېدو او جنګ نه ډډه وکړي".
روئټرز: د ایران د سرکاري ټي وي ترمخه، د پوځ یو جګپوړي کمانډر سیاووش میهندوست نن د جمعې په ورځ ویلي چې په حمله کې هېڅ قسمه نقصان ندی رامنځته شوی. هغه زیاته کړې چې په اصفهان کې چې تېره شپه څه غږونه اورېدل شوي دي، هغه د فضایي دفاع د سیسټمونو آواز و چې یو "مشکوک څیز" یې په نښه کولو.
امریکایي رسنیو د امریکا د چارواکو له قوله، چې نومونه یې ندي اخېستل شوي، خبر ورکړی چې اسرایل د جمعې په ورځ د لمر خاتو دمخه، په ایران کې دننه د میزائیل حمله کړې ده.
د اې بي سي، سي بي اېس، او – اېن پی آر رسنیو پخپلو رپوټونو کې نور جزئیات ندي وړاندې کړي چې دا مبینه حمله چېرته شوې او کوم ځای په کې په نښه شوی دی.
روئټرز خبري ادارې د یو ایراني چارواکي له قوله، چې نوم یې ندی څرګند، ویلي چې په اصفهان کې د چاودنې کوم غږونه چې اورېدل شوي، هغه د ایران د فضایي دفاع د سیسټمونو د فعاله کولو په وجه و، او ګني د ایران په ضد د میزائیل کوم برید ندی شوی.
د اسرایل د پوځ یو ترجمان د دغو رپوټونو د خورېدو نه یو ساعت پس وي او اې ته وویل، هغه "دا شيبه" د امریکایي رسنیو په دغو رپوټونو څه تبصره نه کوي.
د ایران سرکاري خبري ادارې، اېرنا ویلي دي چې د هغه هېواد فضایي دفاعي سیسټمونه د څو ولایتونو په سر فعاله کړی شوي دي.
هم اېرنا، او هم یوې بلې سرکاري خبري ادارې، فارس چې د ایران د سپاه پاسداران انقلاب سره تعلق ساتي، د نامعلومو خبري ذرائعو له قوله ویلي چې د ایران په مرکزي ولایت، اصفهان کې یوه چاودنه شوې ده.
فارس خبري رسنۍ زیاته کړې چې دا چاودنه د اصفهان ښار په مشرقي مضافاتو کې د قهجاورستان ښار کې شوې ده.
همدې حال کې د الجزیزه شبکې خبر ورکړی چې په شام اؤ عراق کې هم د چاودنو اطلاعات مخې ته راغلي خو تر اوسه په دې چاودنو کې د کومې مرګ ژوبلې اطلاع نه ده ترلاسه شوې.
د ایران د یورینیمو د پروګرام د مرکز نطنز په ګډون د ایران یو شمیر ایټمي ساحې په اصفهان کې موقعیت لري.
د سي این این له مخې د جمعې په ورځ ورته یو امریکایي چارواکي ویلي چې اسرایل د ایران په خاوره برید کړی اؤ دا ګام سیمه په نورو شخړو کې هم ښکېلولی شي.
د ایران دولتي ميډیا ویلي چې د جمعې په سهار د ایران د اصفهان ښار د هوایي اډې اؤ یو پوځي مرکز ترڅنګ د دریوؤ چاودنو غږونه اوریدل شوي چې له هغې وروسته په یو شمیر مقاماتو کې د ایران هوایي دفاعي نظام فعال کړل شوی دی.
سي این این وایي چې د چاودنو علت لا په بشپړ ډول نه دی روښانه شوی.
فارس خبرې شبکې ویلي" دفاعي نظام د یو داسې څه په ځواب کې چمتو کړل شوی چې کیدای شي ډرون وي ".
رپورټ کې ویل شوي چې د چاودنې ممکنه هدف پوځي ریډار ؤ اؤ د چاودنې له امله سیمه کې د کورونو اؤ دفترونو شیشې ماتې شوې دي
د ایران له لوري په اسرایل د میزایلو اؤ ډرون بریدنونو ته وروسته تېره هفته د اسرایل وزیراعظم نیتنیاهو ژمنه کړې وه چې په ایران به ځوابي برید کوي.
دا په داسې حال کې ده چې امریکې اؤ ګڼ شمیر اروپایي هیوادونو د اسرایل نه غوښتنې کړي دي چې ایران ته باید د هغوي د برید ځواب ور نه کړي اؤ د زغم څخه کار واخلي.
ایران هم خبرداری ورکړی چې که برید پرې وشي نو ددې به سختې نتیجې مخې ته راشي.
څېړونکي ویرې ښیي چې په غزې کې روانه جګړه د سیمې نورو هیوادونو ته خوریدای شي.
په غزې کې ورسته له هغې د تاریخ یوه خونړۍ جګړه پېل شوې چې په اووم اکتوبر د فلسطین وسله والې ډلې حماس په اسرایل حمله وکړه اؤ نزدې ۱۲۰۰ کسان یې وژل اؤ ۲۴۰ یې نور یرغمال کړل.
د حماس د برید ځواب کې اسرایل په غزې کې جګړه پېل کړې چې د حماس د واک لاندې د غزې د روغتیا وزارت له مخې په دې جګړه کې تر اوسه 33,970 کسان وژل شوي اؤ 76,770 نور ژوبل شوي دي.
د ایران ملاتړو وسله والو ډلو په لبنان ، یمن اؤ عراق کې هم بریدونه پېل کړي اؤ د فلسطینیانو د ملاتړ اعلان یې کړی.
په اسرایل د حملې په سر امریکې او اتحادیانو يې په ایران پابندۍ ولګولې
واشنګټن (وي او ای/ای پي/ای اېف پي/روېټرز) په اسرایل د حملې په سر امریکي د زیارت، پنجشنبې، په ورځ په ایران پابندۍ ولګولې او هغه افراد او کمپنۍ يې په نخښه کړې چې د ایران پوځ ته وسله او نور مواد ورسوي.
د امریکې صدر جوبایډن په یو بیان کې وویل په اسرایل حمله په ناکامه کولو کې يې مرسته کړې او اوس د ایران احتساب کوي او په ایران نوي بندیزونه او د برامداتو قدغنونه لګوي.
بایډن د ایران پلویان ته هم خبرداری ورکړو او ویې وېل دا واضحه ده چې هغه څوک چې د ایران د حملو ملاتړ کوي، امریکا د اسرایل تحفظ ته ژمنه لري او په سیمه کې د خپلو امیني ځواکونو او همکارانو د تحفظ دپاره به هر ضروري ګام په اخلي او د مخالفینو احتساب به کوي.
امریکې او اتحادیانو يې په ایران بندیزونه په داسې حال کې اعلان کړي چې اسرایل د ایران د حملې په جواب ورکولو غور کوي.
د ایران صدر ابراهیم رییسي د سرښار تهران سره نږدې د پوځیانو کلیز پرېډ ته وویل که اسرایل په ایران حمله وکړه نو ایران به ورته دروند او سخت جواب ورکوي..