Uzulu seveze imbono etshiyeneyo phezu kwembiko ethulwe ngeleRussia eyokuthi kulezizalwane zeZimbabwe eziphatheke empini yalo leleUkraine zincedisana lebutho lakweleUkiraine.
Ugatsha lwakweleRussia olubona ngezomvikela lwazise liviki ukuthi abeZimbabwe laba bahlanu njalo luthi ibutho lalo selabulala oyedwa.
I-Russia ithi njalo amanye amazwe eAfrica alezizalwane zawo ezilwisana layo zincedisana leUkraine agoqela eleSouth Africa, Kenya, Algeria leNigeria kuthi aphetsheya agoqela eleMelika, Poland, Romania, iBhilithani lamanye atshiyeneyo.
Ithi njalo kusukela ngomnyaka ka2022 kuqala limpi, abantu abavele kwamanye amazwe bezolwisana layo bekucele lakweleUkraine bedlula inkulungwane ezilitshumi, 13,387, kanti asebefele kulimpi bazinkulungwane phose eziyisithupha, 5,962.
Kodwa iRussia ayitshongo ukuthi bakhona yini abakwamanye amazwe abalwa kulimpi bekucele layo lokuthi bangaki.
Umphathintambo obona ngobudlelwano beZimbabwe lamanye amazwe uMnu Fredrick Shava ubengabambeki ecingweni kanti lonobhala kugatsha lwakhe uMnu James Manzou kaphendulanga imibuzo esimthumele yona.
Lanxa abanye besithi kulungile ukuthi izizalwane zeZimbabwe lezamanye amazwe ziphatheke empini yeRussia leUkraine, abanye bathi abantu laba bazithela empini engadingi bona.
Kodwa ingcwethi ehlaziya ezombusazwe uMnu Effie Dlela Ncube utshele iStudio 7 ukuthi akusiyonto entsha ukuthi abantu baphatheke empini zakwamanye amazwe, khona athi kwaqala kudala ukwenzakala ngitsho lasempini zamazwe omhlaba.
Forum