Zëvendës-Ndihmës Sekretari i Shtetit për Evropën dhe Euroazinë, Gabriel Escobar, tha sot në Uashington se sfidat kryesore në Ballkanin Perëndimor janë marrëdhëniet me njëri-tjetrin dhe integrimi euro-atlantik, por sipas tij, mundësitë që ofron rajoni janë shumë më të rëndësishme sesa rreziqet. Në Shqipëri, Inspektoriati i Mbrojtjes së Territorit nisi sot një aksion për prishjen e një kompleksi shumëkatësh në bregdet pjesë e 'Prestige Resort', në pronësi të 'Hysenbelliu Group', i cili zotëron dhe disa media të rëndësishme në vend. Në Kosovë, vrasja të mërkurën në mbrëmje e një gruaje shtatzëne nga ish-bashkëshorti i saj, ka ngjallur reagime të shumta dhe thirrje për angazhim institucional në shtimin e sigurisë për gratë.