Pikëpamja e qeverisë së SHBA

Që nga fillimi i konfliktit mes Izraelit dhe Hamasit, i shkaktuar nga sulmi terrorist i Hamasit më 7 tetor, Shtetet e Bashkuara kanë udhëhequr përpjekjet për dërgimin e ndihmave humanitare në Rripin e Gazës për të lehtësuar vuajtjet e palestinezëve të pafajshëm.

Në një konferencë shtypi, i dërguari i posaçëm amerikan për Çështjet Humanitare në Lindjen e Mesme, David Satterfield, tha: "Vëllimi i ndihmës është rritur në mënyrë dramatike në muajt e fundit."

“Izraeli ka ndërmarrë hapa të rëndësishëm në dy javët e fundit për hapjen e korridoreve të ndihmave humanitare, duke hapur vendkalimin në Erez. Një vendkalim tjetër verior është në proces të hapjes. Kjo u bë me kërkesën tonë. Vendkalimi porta 96 në qendër të Gazës është hapur tashmë prej disa javësh dhe po përdoret nga OKB-ja për të transferuar ndihma humanitare në Gazë.”

"Edhe Jordania po dërgon ndihma humanitare drejtpërdrejt në Gazë përmes Izraelit verior.”

Ambasadori Satterfield tha se "Ne do të kemi një vëllim të shtuar të ndihmave brenda javëve të ardhshme, duke i transferuar ato nga toka dhe deti. Ka ende punë të konsiderueshme për të bërë, por është bërë përparim."

Është bërë gjithashtu përparim në krijimin e një mekanizmi efektiv komunikimi "që funksionon në kohë reale" midis punonjësve të organizatave humanitare dhe personelit të ushtrisë izraelite. “Shumë punonjës humanitarë janë vrarë”, tha me keqardhje ambasadori Satterfield.

Ai gjithashtu solli në qendër të vëmendjes Hamasin, duke theksuar se "Që nga 13 shtatori 1993, Hamasi mund të kishte marrë një vendim për Marrëveshjen e Oslos, të pranonte ato që ne i quajmë parime të Oslos".

“Këto parime përfshijnë zotimin për të shmangur përdorimin e dhunës dhe për të pranuar një zgjidhje të negociuar dhe paqësore të çështjes palestinezo-izraelite. Por, Hamasi, për arsyet e veta ideologjike dhe politike, ka zgjedhur dhunën dhe kërcënimet për arritjen e qëllimeve të veta. Viktimat më të mëdha të kësaj qasjeje kanë qenë vetë palestinezët, jo vetëm izraelitët që u masakruan më 7 tetor”.

Ambasadori Satterfield deklaroi: "Le të mos e harrojmë, se kushtet tona korrekte janë kërkesat e drejta që Izraeli të marrë hapat e nevojshme për të siguruar kalimin e ndihmave humanitare dhe se pala përgjegjëse për vuajtjet në këtë konflikt është grupi terrorist i Hamasit".

Që nga shtatori i kaluar, Rusia ka bërë thirrje 14 herë për një takim të Këshillit të Sigurimit të OKB-së në përpjekje për ta fajësuar Kievin për agresionin e saj ndaj Ukrainës.

Moska po përpiqet t’i shtrembërojë veprimet e saj të 24 shkurtit të vitit 2022, duke u përpjekur ta portretizojë Ukrainën si vend agresor në luftën e filluar nga vetë Federata Ruse.

Kremlini aludon se e drejta e natyrshme për t’u vetëmbrojtur nuk zbatohet në rastin e Ukrainës, ose për ndonjë vend të vogël dhe se Ukraina nuk ka të drejtë të marrë ndihma nga aleatët e saj për të mbrojtur qytetarët dhe territorin e saj. Duhet të jemi të qartë se Federata Ruse nuk është viktima në luftën e paprovokuar të Vladimir Putinit kundër Ukrainës.

“Ne i dëgjojmë me vëmendje ato që thotë Rusia”, tha ambasadori John Kelley, këshilltar politik i Shteteve të Bashkuara në OKB. “Por le të shohim edhe veprimet e saj. Rusia po kryen agresion kundër një vendi sovran, anëtar të Kombeve të Bashkuara. Rusia vazhdon sulmet e pamëshirshme ndaj Ukrainës për të pushtuar territoret e saj”.

Pavarësisht se kritikoi aleatët e Ukrainës për furnizimin e saj me mjete për t'u mbrojtur, Rusia kërkon dhe merr armatime nga burime të ndaluara nga OKB-ja.

“Që nga dhjetori i kaluar, forcat ruse kanë përdorur mbi 40 raketa balistike të furnizuara nga Koreja e Veriut për të goditur Ukrainën. Që nga shtatori i kaluar, Rusia ka blerë mbi 11 mijë kontejnerë me municione dhe materiale ushtarake nga Pheniani, duke shkelur embargon e armëve që Kombet e Bashkuara kanë vendosur ndaj Koresë së Veriut. Rusia vazhdon gjithashtu të thellojë marrëdhëniet e saj ushtarake me Iranin, përfshirë blerjet e vazhdueshme të dronëve ushtarakë që i përdor për të sulmuar popullin ukrainas dhe infrastrukturën civile”, tha ambasadori Kelley.

“Ne vazhdojmë të jemi të shqetësuar lidhur me njoftimet se Rusia kërkon të sigurojë raketa balistike nga Irani. Një blerje e tillë do të përbënte një përshkallëzim domethënës të mbështetjes së Iranit për agresionin e Rusisë. Komuniteti Pjesa dërrmuese e komunitetit ndërkombëtar e ka dënuar agresionin rus në Ukrainë. Siç e kam thënë edhe më parë, Rusia mund t'i japë fund kësaj lufte sot”, tha ambasadori Kelley.

“Shtetet e Bashkuara mbeten të përkushtuara për t'i ofruar Ukrainës atë që i duhet për ta mbrojtur veten. Ne i bëjmë thirrje edhe një herë Rusisë që të tërheqë menjëherë forcat e saj nga territori i Ukrainës, brenda kufijve të saj të njohur ndërkombëtarisht dhe të ndalojë blerjen e paligjshme të materialeve ushtarake nga Koreja e Veriut”.