Pikëpamja e qeverisë së SHBA

Më 1 prill, disa komandantë dhe oficerë të lartë që mbikëqyrnin operacionet e fshehta të Iranit në Lindjen e Mesme u vranë gjatë një sulmi ushtarak në Damask të Sirisë, sipas njoftimeve të shtypit. Zëdhënësi i Shtëpisë së Bardhë për çështjet e sigurisë kombëtare, John Kirby i cilësoi “të pakuptimta” akuzat iraniane se Shteteve të Bashkuara ishin përgjegjëse për sulmin. “Më lejoni ta bëj të qartë”, tha ai gjatë një konference për shtypin. “Ne nuk kishim asnjë lidhje me sulmin në Damask”.

Ambasadori Robert Wood, Përfaqësuesi Alternativ për Çështjet e Posaçme Politike në OKB tha: “Ndërsa ne mbledhim detaje për sulmin, një gjë është e qartë: Irani dhe grupet e mbështetura prej tij dhe grupet partnere duhet të shmangin përshkallëzimin e tensioneve në rajon”.

“Në të vërtetë, që nga sulmi terrorist i 7 tetorit në Izrael, Shtetet e Bashkuara e kanë paralajmëruar vazhdimisht Iranin që të mos përfitojë nga situata për të përshkallëzuar luftën e tij të gjatë kundër Izraelit dhe të tjerëve. Irani e ka injoruar këtë paralajmërim”, tha ai. “Terroristët dhe grupet e tjera të armatosura, disa të mbështetur nga regjimi sirian dhe Irani, kanë përdorur territorin sirian për të organizuar dhe kryer sulme ndaj Izraelit dhe ndaj objekteve dhe personelit të SHBA-së".

Hezbollahu i mbështetur dhe i armatosur nga Irani e sulmon rregullisht Izraelin nga Libani.

“Në Detin e Kuq, anëtarët e grupi Huthi të mbështetur nga Irani kanë shkelur ligjin ndërkombëtar dhe kanë sulmuar vazhdimisht anijet. Grupet e mbështetura nga Irani kanë sulmuar gjithashtu objektet diplomatike të Shteteve të Bashkuara në Irak dhe kanë sulmuar personelin ushtarak amerikan të angazhuar në luftën kundër Shtetit Islamik. Dora e Iranit është e dukshme në veprimet e të gjitha këtyre grupeve terroriste, që kanë mbështetjen apo janë partnerë të tij.”

“Ne kemi gjithashtu shqetësime të kahershme në lidhje me përdorimin e territorit sirian për të nisur sulme ndaj vendeve fqinje”, tha ambasadori Wood.

“Për shembull, më 31 mars, një avion luftarak izraelit thuhet se zbuloi një objektiv të dyshimtë ajror që po shkonte nga Siria drejt Izraelit. Në shumë raste që nga 7 tetori, ne kemi parë raketa, dronë të armatosur dhe armatime të tjera të lëshuara nga territori sirian drejt pozicioneve izraelite në dhe rreth Lartësive Golan.”

Shtetet e Bashkuara kanë ndërmarrë hapa në vetëmbrojtje për t'iu përgjigjur sulmeve ndaj personelit ushtarak amerikan që kryen operacione kundër ISIS-it në Siri dhe Irak.

Të gjitha vendet, përfshirë Iranin dhe Sirinë, kanë përgjegjësinë për të shmangur rrugën e përshkallëzimit, për të ndalur armatosjen e grupeve terroriste dhe për të frenuar veprimet e grupeve që mbështetën prej tij, që kërcënojnë paqen dhe sigurinë rajonale.

“Ne jemi nga vende të mëdha dhe të vogla, nga Lindja dhe Perëndimi, nga ekonomitë e zhvilluara dhe ato në zhvillim. Por ne jemi të gjithë të bashkuar nga një bindje e fortë se demokracia është mjeti i vetëm më i fuqishëm për të çliruar potencialin njerëzor dhe për të dhënë rezultate për njerëzit tanë”, tha Sekretari i Shtetit Antony Blinken në Samitin e fundit për Demokracinë në Seul.

“Kishte një valë të fuqishme hapjeje politike në mbarë botën pas përfundimit të Luftës së Ftohtë, por kjo është pasuar nga gati dy dekada të prapambetjes demokratike në shumë vende”, tha Sekretari Blinken.

“Ka patur një rritje të shkeljes së lirive themelore dhe një goditje të sistemit të zgjedhjeve të lira. Korrupsioni ka goditur shpresat për përparim. Të udhëhequr nga slogani i Samitit, gjatë tre viteve të fundit, ne jemi ngritur së bashku për të përballuar këtë sfidë. Më shumë se 100 qeveri nga çdo pjesë e botës janë zotuar të ndërmarrin veprime konkrete për të forcuar dhe rimëkëmbur demokracinë, si në vendet e tyre, por edhe duke punuar së bashku për të trajtuar kërcënimet e përbashkëta në mbarë botën.”

Shtetet e Bashkuara po mbrojnë mediat dhe gazetarët e pavarur, theksoi Sekretari Blinken.

“Shtetet e Bashkuara kanë ofruar grante në rreth 20 vende për të forcuar qëndrueshmërinë afatgjatë të organeve të medias përmes Fondit Ndërkombëtar për Mediat në Mbështetje të Interesit Publik. Dhe ne po përmirësojmë sigurinë e gazetarëve, përfshirë ata që veprojnë në mërgim me synim mbrojtjen e gazetarisë.”

Shtetet e Bashkuara kanë filluar zbatimin e një Plani të ri Veprimi Kombëtar për sjelljen e përgjegjshme të bizneseve. Ky plan përfshinë më shumë se 40 veprime konkrete në të gjithë qeverinë amerikane për t’u siguruar që kompanitë me të cilat ne punojmë mbrojnë të drejtat e njeriut.

"Nëse duam që brezat e ri të mbështesin shoqëritë demokratike, rigjallërimi i demokracisë kërkon gjithashtu që ne të formojmë një të ardhme teknologjike që nxit përparimin e njerëzve", vuri në dukje Sekretari Blinken.

"Ndërsa regjimet autoritare dhe shtypëse përdorin teknologjinë për të minuar demokracinë dhe të drejtat e njeriut, ne duhet të sigurohemi që teknologjia të përdoret për të mbështetur vlerat dhe normat demokratike."

"Demokracia nuk ndërtohet me veprime të rastësishme", deklaroi Sekretari Blinken. “Duhet ta rimëkëmbim atë vazhdimisht. Ne e bëjmë këtë të sigurt duke ditur se demokracia është një aspiratë e përbashkët për njerëzit në mbarë botën dhe që kërkesa për demokraci përfaqësuese të mbetet e fortë.”