Ceistean às ùr mu phlana Sràid na h-Acadamaidh
- Air fhoillseachadh
Nochd ceistean ùra mu phlanaichean gus cuid de thrafaig a chasg bho Shràid na h-Acadamaidh ann an Inbhir Nis is rannsachadh ùr ag ràdh nach biodh luach an airgid ann.
Chuir Comhairle na Gàidhealtachd na planaichean air adhart feuch eimiseanan a ghearradh agus barrachd dhaoine a thàladh a-steach gu meadhan Inbhir Nis, cho math ri daoine a bhrosnachadh a bhith a' coiseachd is a' rothaireachd.
Tha Sràid na h-Acadamaidh tric air nochdadh am measg nan sràidean as miosa ann an Alba a thaobh truaillidh.
Tha na planaichean air a bhith connspaideach bho thùs ge-tà, is dh'iarr an t-ùghdarras ionadail fhèin rannsachadh neo-eisimeileach is iad ag ràdh gun robh iad ag aithneachadh gun robh draghan ann bho ghnothachasan ionadail is feadhainn a tha a' fuireach faisg air làimh.
'S iad a' bhuidheann WSP a rinn an rannsachadh, taobh a-muigh.
Ged a fhuair iad gum faodadh buannachdan eaconamach eadar £1.5m is £4m a bhith ann, nochd iad rabhadh cuideachd mu chosgaisean a bharrachd air gnothachasan is droch bhuaidh air trafaig ann am pàirtean eile den bhaile.
Tha an rannsachadh ag ràdh nach biodh luach an airgid anns na planaichean, le £0.51 ann 'son gach £1 a bhiodh air a chosg.
Conaltradh
Tha gnothachasan a tha a' cur an aghaidh nam planaichean ag ràdh gu bheil ceistean mòra ann mun leasachadh.
"Cha deach bruidhinn ri gnothachasan mar bha a còir", thuirt Iain Dòmhnallach bho BID Inbhir Nis.
"'S iad a' Chomhairle a chuir an rannsachadh seo air adhart is tha e air a dhol ceàrr orra gu ìre.
"Feumaidh iad a-nise bruidhinn ri gnothachasan is èisteachd riutha a thaobh na slighe air adhart", thuirt e.
Tha Comhairle na Gàidhealtachd ag ràdh gu bheil an rannsachadh aig WSP a' sealltainn an t-suidheachaidh as miosa a dh'fhaodadh a bhith ann.
Thuirt iad gu bheil iad air am misneachadh leis na tomhasan mu na buannachdan eaconamach is gu bheil iad ag obair gus seirbheisean bus a-steach a mheadhan Inbhir Nis a leasachadh.
Tha iad ag ràdh gun toireadh an leasachadh piseach mòr air meadhan a' bhaile.
Bidh co-chomhairle phoblach ann a-nise mus tèid co-dhùnadh an gluais a' Chomhairle air adhart leis na planaichean.
Thèid an rannsachadh gu lèir fhoillseachadh an seo, taobh a-muigh Dihaoine.
Tuilleadh air an sgeulachd seo
- Air fhoillseachadh28 An Lùnastal 2023
- Air fhoillseachadh13 An t-Iuchar 2022