Mèirle nan soidhnichean an Loch Abar ga rannsachadh
- Air fhoillseachadh
Tha Poileas Alba a' rannsachadh mar a chaidh an t-uabhas de shoidhnichean rathaid a ghoid ann an Loch Abar nas tràithe air a' mhìos.
Tha beachd ann gur dòcha gun deach na soidhnichean a ghoid airson a' mheatailt a reic.
Dhearbh na poilis gun deach falbh le 36 soidhnichean uile gu lèir eadar Gleann Fhionnainn is Àrasaig air rathad an A830 ann an Loch Abar.
'S iad na soidhnichean fhèin a chaidh a ghoid oir tha na pòlaichean fhathast air fhàgail.
Tha na poilis den bheachd gun do thachair seo eadar an 15mh is an 17mh den Mhàrt.
Am measg nan loidhnichean air a bheil iad a' coimhead, 's e gun robh mèirlich airson a' mheatailt a reic.
Tha Poileas Alba airson bruidhinn ri duine sam bith a chunnaic dad amharasach no aig a bheil dealbhan dash-cam.
Bu chòir fios a chur thuca tro 101 air neo tro Crimestoppers is àireamh CR/0101488/24 a thoirt seachad.