កម្មវិធីវិទ្យុ
ព័ត៌មានពេលព្រឹក៖ ១៦ កញ្ញា ២០២១
ព័ត៌មានអំពីកម្ពុជាមានដូចជា ពលរដ្ឋ៩នាក់ត្រូវចោទប្រកាន់និងឃុំខ្លួន ក្នុងជម្លោះដីធ្លីនៃគម្រោងព្រលានយន្តហោះថ្មីក្នុងខេត្តកណ្តាល។ សាលារៀននៅភ្នំពេញចាប់ផ្តើមបើកឡើងវិញ ប៉ុន្តែសិស្សានុសិស្សបន្តព្រួយបារម្ភអំពីការឆ្លងជំងឺកូវីដ១៩។ រីឯព័ត៌មានអន្តរជាតិវិញមានដូចជា សៀវភៅដែលនឹងត្រូវចេញផ្សាយក្នុងពេលខាងមុខនិយាយពីភាពមន្ទិលនៃវិចារណញ្ញាណរបស់លោក Trump និងការហៅទូរសព្ទជាសម្ងាត់របស់ឧត្តមសេនីយ៍យោធាអាមេរិក ជាមួយឧត្តមសេនីយ៍ចិន។ សហភាពអឺរ៉ុបនឹងហាមឃាត់ការនាំចូលផលិតផលដោយពលកម្មបង្ខិតបង្ខំនៅក្នុងប្រទេសចិន។ សមាជិកសភាថៃ ជជែកដេញដោលសេចក្តីព្រាងច្បាប់ដែលរង់ចាំជាយូរយារមកហើយស្តីពីការធ្វើទារុណកម្មនិងការចាប់ពង្រត់។ សហភាពអឺរ៉ុបសន្យាផ្តល់វ៉ាក់សាំងកូវីដ១៩ចំនួន២០០លានដូសដល់ប្រទេសដែលមានប្រាក់ចំណូលទាប។ ប្រធានសហភាពអឺរ៉ុប អំពាវនាវឲ្យរដ្ឋជាសមាជិក អភិវឌ្ឍសមត្ថភាពការពារខ្លួន ដោយគ្មានការគាំទ្រពីសហរដ្ឋអាមេរិក។ ទ្វីបអាហ្វ្រិកពង្រឹងប្រព័ន្ធតាមដានជំងឺកូវីដ១៩បំប្លែងថ្មី៕
ព័ត៌មានពេលរាត្រី៖ ១៦ កញ្ញា ២០២១
ព័ត៌មានអំពីកម្ពុជាមានដូចជា ក្រុមហ៊ុន GFX ពន្យារពេលអតិថិជនមកទទួលប្រាក់សំណង៣០% ខណៈលោក ហ៊ុន សែន ឲ្យសម្រុះសម្រួលជម្លោះ មុនប្តឹងទៅតុលាការ។ សង្គមស៊ីវិល ជំរុញរដ្ឋាភិបាលឲ្យពិចារណាផ្តល់សំណងសមរម្យដល់អ្នកមានជម្លោះក្នុងគម្រោងព្រលានយន្តហោះថ្មីនៅខេត្តកណ្តាល។ នៅក្នុងកម្មវិធី Hello VOA ថ្ងៃនេះ មានកិច្ចពិភាក្សាអំពី«តើយើងត្រូវការចាក់វ់ាក់សាំងកូវីដ១៩មួយដូសបន្ថែមទៀត ឬវ៉ាក់សាំងជំរុញដែរឬទេ?»។ រីឯព័ត៌មានអន្តរជាតិវិញមានដូចជា សហរដ្ឋអាមេរិក និងចក្រភពអង់គ្លេស គ្រោងជួយអូស្ត្រាលីផលិតនាវាមុជទឹកប្រើនុយក្លេអ៊ែរ។ មានសេចក្តីរាយការណ៍ថា ឥណ្ឌាជិតបន្តការបញ្ចេញវ៉ាក់សាំងបង្ការជំងឺកូវីដ១៩។ អាមេរិកគាំទ្រប្រទេសលីទុយអានីក្នុងជម្លោះជាមួយចិនអំពីកោះតៃវ៉ាន់។ មេដឹកនាំជនជាតិដើមភាគតិច ជំរុញឱ្យមានគោលដៅថ្មីក្នុងការការពារព្រៃអាម៉ាហ្សូនពីការកាប់បំផ្លាញ និងព័ត៌មានមួយចំនួនទៀត៕