កម្មវិធីវិទ្យុ
ព័ត៌មានពេលព្រឹក៖ ២១ កញ្ញា ២០២១
ព័ត៌មានអំពីកម្ពុជាមានមន្រ្តីសិទ្ធិមនុស្សនិងអ្នកកាសែត បារម្ភអំពីការបន្តរឹតត្បិតសេរីភាពនៃការបញ្ចេញមតិ ក្រោយពីនាយករដ្ឋមន្រ្តីគំរាមអ្នកវិភាគខ្លះ។ លោក ហ៊ុន សែន ស្នើតុលាការទម្លាក់ចោលដីកាចាប់ខ្លួនអ្នកវិភាគ លោក សេង សារី។ រីឯព័ត៌មានអន្តរជាតិវិញរួមមាន រដ្ឋមន្ត្រីការបរទេសសហភាពអឺរ៉ុប នឹងពិភាក្សាបញ្ហាកិច្ចព្រមព្រៀងនាវាមុជទឹកប្រើដោយថាមពលនុយក្លែអ៊ែរ។ ក្រុមហ៊ុនឱសថ Pfizer របស់អាមេរិកនិយាយថា វ៉ាក់សាំងប្រឆាំងកូវីដ១៩របស់ខ្លួន មានសុវត្ថិភាពនិងប្រសិទ្ធភាពសម្រាប់កុមារអាយុចន្លោះពី៥ឆ្នាំទៅ១១ឆ្នាំ។ អ្នកស្រី Suu Kyi មិនបញ្ចេញយោបល់ទៅលើការអំពាវនាវឲ្យមានសង្គ្រាមប្រឆាំងរបបសឹកយោធាក្នុងប្រទេសមីយ៉ាន់ម៉ា។ ប៉ូលិសក្រុងហុងកុងប្រកាសចាប់ខ្លួនក្រុមនិស្សិត ដែលថ្លែងសុន្ទកថានិងប្រមូលអាហារសម្រាប់អ្នកទោស។ នាយករដ្ឋមន្ត្រីថ្មីនៃប្រទេសម៉ាឡេស៊ីនិងមេដឹកនាំគណបក្សប្រឆាំងចុះហត្ថលេខាលើកិច្ចព្រមព្រៀងសហប្រតិបត្តិការ និងព័ត៌មានផ្សេងទៀត៕
ព័ត៌មានពេលរាត្រី៖ ២១ កញ្ញា ២០២១
ព័ត៌មានអំពីកម្ពុជាមានដូចជា លោក ហ៊ុន សែន ចោទមហាអំណាចជ្រៀតជ្រែកកិច្ចការផ្ទៃក្នុង ខណៈលោក សម រង្ស៊ី ចោទមេដឹកនាំកម្ពុជា «ចូលដៃ»ជាមួយចិន។ ពលរដ្ឋ៩នាក់ត្រូវបានដោះលែង ក្រោយសន្យាឈប់តវ៉ារឿងទំនាស់ដីធ្លីក្នុងគម្រោងព្រលានយន្តហោះថ្មីនៅខេត្តកណ្តាល។ សហជីព៖ កម្មករអាចពិចារណាប្រើសិទ្ធិតវ៉ា បើនិយោជកបង្ហាញចេតនាមិនដំឡើងប្រាក់ឈ្នួល។ រីឯព័ត៌មានអន្តរជាតិវិញមានដូចជា លោក Biden នឹងប្រើកិច្ចប្រជុំអង្គការសហប្រជាជាតិជំរុញពហុភាគីនិយម និងសកលនិយម។ សហរដ្ឋអាមេរិក បន្ធូរការរឹតត្បិតអំពីវីរុសកូរ៉ូណាសម្រាប់ការធ្វើដំណើរបរទេស។ អ្នកផលិតឱសថថា វ៉ាក់សាំងកូវីដ១៩របស់ក្រុមហ៊ុន Pfizer មានសុវត្ថិភាពសម្រាប់កុមារអាយុចន្លោះ៥ ដល់១១ឆ្នាំ។ ក្រុមអ្នកវិភាគ៖ ចិនកំពុងពង្រីកឥទ្ធិពលនៅអាហ្វ្រិកតាមរយៈកិច្ចសន្យាផ្គត់ផ្គង់បណ្តាញទូរគមនាគមន៍ និងព័ត៌មានមួយចំនួនទៀត៕